Mizoram Presbyterian Kohhran thalai, Kristian Thalai Pawl (KTP) General Conference Vawi 60-na chuan ram pum huapin aia upa zah inzirtir ni se, tih an rel. Nimina Ngopa Chhim Veng Kohhran Biak Ina General Conference rorel inkhawmah ruihhlo do kawnga hma lak ni se, tiin an rel bawk a. Kum 2024-25 budget atana ruahman Cheng Nuai 71 Sing 5 chu pawm a ni a. Reception office atanga thu dawn danin palai hi nimin thleng khan mi 25,000 bawr vel an nih tawh beisei a ni a; hriat theih chinah mikhual riak lut hi 17,849 an ni a, in-report lo mi 1000 atanga 1500 vel riak lut an awm bawk ni-a hriat a ni.
Nimin Rorel Inkhawm lai hian pandal-ah ‘Thalaite rawngbawlna hmathlir’ tih thupui hmangin inkhawm buatsaih a ni a. Chawhnu lamah Variety programme hman a ni. Nizan atang khan Pathian biak inkhawmah Speaker Rev. Dr. H Vanlalruata’n thu a sawi tan a, inkhawm banah KTP General Conference Diamond Jubilee Concert buatsaih a ni bawk.
Hetihlai hian nimina Conference-a kal tur Bawngkawn leh Bawngkawn Shalom Branch te chuanna lirthei chu Saichal daiah tlan liamin meter 100 vel a lum a; lirtheia chuang zing ami, Rebecca Lalrinmawii Bawngkawn Shalom Branch chu vanduaithlak takin a boral. Lirtheiah hian mi 4 chuangin Rebecca Lalrinmawii tih loh hi chuan hliam na lutuk an tuar lova, Saitual District Hospital-ah First Aid pek an nih hnuah chhuahtir an ni. Chetsual thu hriat a nih hian Saitual Police, Sub.Hqrs YMA leh Saichal khawtlang leh Saitual Kohhran Upa leh KTP hruaituten buaipui ngai apiang an buaipui zui a ni.
