Myanmar Chin state a Myanmar sipai sorkarna paihthlak tuma din Chin pawl 2-te inkara harsatna chingfel turin nimin khan Aizawlah pawl pahnih aiawhte an inbia.
Zo Reunification Organisation (ZoRO) ruahmanna hnuaiah hian Chin state a Myanmar sipai dotu Chin National Front (CNF) hruaitute leh Zomi Reunification Organisation (ZRO) hruaitute hi an inbia a. Thawhhona thuthlung ziakin Zofate(Chin-Kuki-Zomi/Mizo) chu thlahtu thuhmun, tawng khat hmang (Same language – different dialect), nunphung thuhmun, serh leh sang inkhawih pawlh, beiseina thuhmun vuana dam leh tlang khatah, thih leh ruam khatah ti thin unau an nih thu an tarlang a. Ram leh hnam tana hma an lakna kawngah an thahnemngaih luat avanga unau an inhmu thiam lo chu pawi an tih thu leh tun hnuah thleng tawh lo se an duh thu sawiin inremna tluantling a awm theih nan a tul dan a zira inbiakna neih leh nise an ti bawk a ni.
Thawhhona Thuthlungah hian ZRO Team leader Pu K.C. Smack leh CNF aiawhin an Vice chairman number one Pu Thang Ning Kee te’n hming an ziak a. ZoRO aiawhin an president Pu R. Sangkawia leh general secretary Pu L. Ramdinliana Renthlei te’n an hming an ziak bawk a ni.
