Planning & Programme Implementation Department hnuaia Mizoram Startup Mission (MSUM) kaltlanga buatsaih tur, Mizoram Rahbi 5.0 chu vawiin tlai 4:30 khan Chief Secretary Dr. Renu Sharma, Chairperson, Mizoram Startup Mission (MSUM), Governing Board ni bawk chuan a Pisa, MINECO, Aizawlah a hawng. Hawnna puala hun hmanah Chief Secretary Dr. Renu Sharma chuan Mizoram Rahbi 5.0 kalpui tur chu Sawrkar hmalakna pawimawh tak, sundawnna kawnga chin dan thar leh dangdai deuh ngaihtuah chhuaka, eizawnna ngelnghet siam bakah state sum leh pai dinhmun siamthat kawnga hmalakna a nih thu a sawi a. Sundawnna leh eizawnna kawnga bultan tum, hmabak eng takte chawikan nana ruahman a nih thu sawiin, “He intihsiaknaah hian Mizoram mi leh sa, tunhnaia sundawnna kawnga hma la leh helama tuimite an tel thei dawn a, hemi kaltlanga titha thlan chhuahte chuan cheng nuai 7.5 thleng tanpuina an dawng thei dawn a ni,” a ti a. Mizoram Rahbi 5.0 chu Mizoram tana sundawnna kawnga hmalakna thar, viak tha leh hlawhtling a nih ngei theih nana ngaihlua a tam thei ang ber tel tum turin mipuite a sawm a ni.
Mizoram Rahbi 5.0 hawnna hunah hian Planning & Programme Implementation (P&PI) Department Secretary Pu Lalmalsawma Pachuau leh Official dangte an tel a ni. Mizoram Rahbi 5.0 hian Mizoram chu a chhunga chengte leh chin dan thar, danglam bik hmangtea mahni kutke ngeia ding thei tura hlankai chu a tum bulpui ber a ni a. Hei hian intihsiakna mai ni lo, sumdawnna kawnga inhrilhhriatna, sumdawng dangte nena inthlunzawmna, a hralhna tur ngaihtuah bakah pawimawh dangte a huam tel a ni. Ruahman dan chuan Mizoram Rahbi 5.0 a tel duh tan dilna hi October ni 31, 2024 thleng hawn a ni dawn a. Dilna thehlutte hi November ni 5-6 chhungin business plan siam dan zirtir an ni dawn a, November ni 7 ah sumdawnna sawifiah dan chungchang workshop neih pui an ni ang a, November ni 18 ral hma ngeiin contestant te’n anmahni puala business plan an buatsaih an thehlut ang.
Hemi endikna atang hian November ni 22 ah contestant intihsiaknaa tel zel theite chinfel a ni ang. Thlan chhuahte tan hian November 26-28 chhungin sundawnna chungchang inhrilhhriatna leh sawifiah dante zirtirna neih a ni ang a, December ni 2 ah final lutte puan an ni ang. December ni 5-6 ah boot camp neihpuiin December ni 11 ah sumdawnna chungchang sawifiahna leh inhrilhhriatna tawp ber neih a ni leh ang a, December ni 12 ah result puan a ni ang. Mizoram Rahbi 5.0 hnuaia hamthatna dawng tura thlan te’n December ni 16, 2024 ah Final Business Plan an thehlut ang. Hrechiang duh tan Mizoram Startup Hub, Planning & Programme Implementation (P&PI) Deparment, Raj Bhavan Gate ep-ah zawhfiah theih a ni a. Dilna hi Office-ah leh MSUM website www.startupmizoram.com ah ngaihven theih a ni a, Office hun chhungin thehluh tur a ni ang.
