Vawiin khan State Level NCORD meeting tum 8-na chu an Chairman Dr. Renu Sharma, Chief Secretary hovin SAD Conference Hall, MINECO-ah neih a ni. Chief Secretary Dr. Renu Sharma chuan drugs leh a kaihhnawih ruihhlo hrang hrang do kawnga enforcement agency-te hmalakna fakawm a tih thu sawiin, ruihhlo dotu hrang hrangte chu tha thlah lova tang mar reng turin a chah a. DC leh SP te chu ruihhlo do kawnga lungrual taka hmalak a nih theih nan leh a sawt zawk nan, tawnhriat leh thu pawimawhte inhrilhhriattawn zung zung a nih theih nan anmahni District-ah theuh District NCORD meeting thla khata vawikhat tal nei turin a chah a ni.
Thusawitu dang DGP Pu Anil Shukla chuan drugs leh ruihhlo dang avanga case ziahluhte chhuichhuah zung zung a nih theih nan Law Enforcement Agency-te tanrual a pawimawh thu sawiin, drugs mai nilo zu, vaihhlo leh a kaihhnawih hrang hrangte pawh ngaihthat theih a nih loh thu a sawi bawk a. Mizoramah drugs kaihhnawih case a pun zel avangin NCB Office din a tul tawh takzet thu sawiin, ruihhlo do kawnga Law Enforcement Agency-te tanrual deuh deuh a tul thu a sawi bawk.
He hunah hian drugs leh a kaihhnawih ruihhlo hrang hrangte do kawnga NCB, Mizoram Police, Excise and Narcotics Department, Assam Rifles leh Social Welfare & Tribal Affairs Department-te hmalakna thlirlet niin, hmalak chhunzawm zel dan turte pawh sawiho a ni a. Pu Lalbiakthanga Khiangte, IGP (Intel) & Head of Anti-Narcotics Task Force chuan Mizoram Police leh Excise & Narcotics Department te’n theihtawp an chhuah thu sawiin, kumin August thla thleng khan drugs cheng vaibelchhe 1797.2 hu an man thu leh, case 640 ziakluta hemi kaihhnawihah mi 870 an man thu a tarlang a ni.
