Vawiin khan 7th Meeting of the State Level NCORD meeting chu Chief Secretary Dr. Renu Sharma kaihhruaina hnuaiah SAD Conference Hall, MINECO-ah neih a ni a. He meeting-ah hian DGP Mizoram, IGP Intelligence, Home Commissioner, Secretary END, state sorkara senior official-te, DDG (ER) NCB, DIG Assam Rifles leh DIG BSF te bakah district tin DC leh SP ten meeting hi Video Conference hmangin an chhim ve a ni.
Vawiin meeting-ah hian Mizoram Police, Excise & Narcotics Department, Assam Rifles, BSF leh MSACS te hmalakna hrang hrang thlirho leh ennawn a ni a, hun lo kal zel tura ruihhlo dona kawnga hmachhawp hrang hrangte sawiho a ni bawk. Pu Veenu Bansal, IGP (Intel) & Head of Anti-Narcotics Task Force chuan Mizoram Police leh END ten theihtawp an chhuah mek tih sawiin, kumin 2024 May thla thlenga ruihhlo (drugs) man tawh zat chu cheng vaibelchhe 982.5 man hu a nih thu leh heng kaihhnawihah case 418 siam tawh niin mi 581 man an ni tawh tih a tarlang.
Pu Anil Shukla, DGP Mizoram chuan ruihhlo dona kawngah NDPS Act hnuaia dan leh inkaihhruaina hrang hrang awmte chu ngai pawimawh a ṭul thu a sawi a. Ruihhlo kaihhnawih case chhui tur leh ruihhlo dona kawngah Dan kengkawhtu (law enforcement agencies) hrang hrangten thawhhona ṭha neih a pawimawh thu a sawi bawk.
Meeting kharna thu a sawinaah chuan Mizoram Chief Secretary Dr. Renu Sharma chuan law enforcement agencies hrang hrangte inpekna leh thawhrimna a fak a, tha thlah lova ruihhlo tihrem kawngah bei zel turin a chah. District tina DC/SP te chu thla tinin District NCORD meeting nei tura hrilhin hei hian ruihhlo dona kawngah ke pen hona pawh nasa takin a tihsawt a beisei thu a sawi.
Tun dinhmunah hian Narco-Coordination (NCORD) hi ṭhuam 4 (4 tier) – Apex NCORD, Executive NCORD, State NCORD leh District NCORD – te hmangin kalpui mek a ni a. Hei hi Ministry of Home Affairs duhdana hmalakna niin, ramchhung hmun kilkhawr ber aṭanga khawpui lian ber thlengin ruihhlo dona kawngah rampuma hmalakna pawimawh tak a ni.
