New Delhi-a cham mek Chief Minister Pu Lalduhoma chuan nimin tlai khan Union Home Minister Amit Shah chu a pisaah hmuin hmasawnna hrang hrang an sawi dun. An inkawmnaah hian Handholding Scheme, Thenzawl Peace City leh project lian danga Mizoramin sum a mamawh te an sawi dun a. Home Minister chuan Parliament Session lo awm leh turah an ngaihtuah tur thu lo hrilhin; Union Finance Minister, Union Home Minister leh Chief Minister te nena sawi tlâng a, tihhlawhtlin dan kawng dap ni se, an ti a ni.
Union Home Minister hian The Mizoram (Maintenance of Household Registers) Bill 2019, President hnena la tang mek chu President pawmpuina hmuh a nih vat theihna tura a lo bawhzui tur thu te, AAI hnena Lengpui Airport hlan chungchang pawh Union Cabinet in an lo ngaihtuah tur thu alo hrilh a, Mizoramah helicopter lian zawk leh mi phur tam thei zawk dah tura Chief Minister ngenna chu a lo bawhzui tur thu leh Lengpui Airport a CISF duty te tihchangtlunna tur Police Modernisation Scheme hnuaia fund dilnate pawh enzui a lo tiam a ni.
Chief Minister hian Union Minister of State for Fisheries, Animal Husbandry and Dairying George Kurian pawh hmu in sangha khawi leh ranvulh kawnga hmasawnna tur Mizoramin project a thehluh hrang hrang te an sawidun a, Pradhan Mantri Matsya Sampada Yojana (PMMSY) hnuaia proposal panga Mizoramin a thehluh tawh chu a ranglama pawmpui tur leh sanction thuai turin a ngen a, Union Minister of State hian heng project te hi a lo enzui a, a lo bawhzui tur thu Chief Minister hi a lo hrilh a ni.
