Chief Minister Pu Lalduhoma chuan Prime Minister hlui Dr Manmohan Singh a thihna-in a thawn thu leh a chhungte a tawrhpui thu a sawi.
Chief Minister chuan Dr Manmohan Singh-a’n ram tana tha a thawh hnem thu sawiin ram ei leh bar hmasawnna leh sorkar inrelbawlna tha siam kawngah hna ropui tak a thawk a ni a ti a. Mi fing leh ropui tak ni chunga inngaitlawm em em mihring a nih thu sawiin uiawm a tih thu Pu Lalduhoma chuan a sawi a. A chhungte a tawrhpui tak zet thu a sawi a ni.
Mizoram Pradesh Congress Committee President Pu Lal Thanzara pawhin Prime Minister hlui, Dr Manmohan Singh a ui thu nizan khan a sawi a. India ram ei leh bar dinhmunah a tha zawnga danglamna lian tak siamtu a ni a ti a. Ram hruaitu lian tak ni chunga mi thawm zawi leh inngaitlawm a nihna chu chhuan lo awm zel tur te ngaihsan a nih phah zel dawn tih sawiin a thihna chu ram tan channa nasa tak a nih thu a sawi a ni.
