Chief Minister Pu Lalduhoma’n sawrkarna an chan tirhah leiba tam avanga sum harsa karah, renchem taka sum an enkawl avangin bill hrang hrang ba tam tak an pe thei ta tih a sawi.Mizoram Economic Association buatsaih, Mizoram Economic Summit 2024, vawiina Aijal Club-a buatsaih a hmanpuinaah Chief Minister chuan, tun hmaa sorkarin RBI balance chhe tak a neih thin chu, renchem taka sum an enkawl avangin tun Financial Year tawpah kha chuan RBI Balance cheng vbc 500 chuang an nei ta a ti a, Healthcare sum ba te, Power Bill ba te an pe thei ta a, Power Bill ah phei chuan sum let, Rebate hmu hialin an ti tha ta a ti a, GP fund tam tham tak pek chhuah a nih bakah, Pension sum rei tak tang tawh te pawh chin fel a ni a, Election duty bill tang tam tak pek niin, sawrkar hnathawkte hlawh leh hamthatna, hun rei tak lo batsak tawh te pawh engemawzat chin fel a ni, a ti bawk.
Chief Minister chuan sorkar laipuia Minister of Road Transport & Highways Pu Nitin Gadkari hnenah Mizoram kawng chhia a ziaawm nan kawng siam dan phung thara kal an dil a ti a, kuminah Mizoramin chhiatna tam tak a tawh avangin rikrum thilah sum hmanna tura an ruahman sa zawng zawng pawh hman a ngai thin a ti a. Mizoram kawng chungchang sawiin NHIDCL in kawng an laih fur khat daih lo a awm a ti a. Tuna kawng siam dan phung kalpui mek chu bituminous pavement a nih thu sawiin hei hian ti a ngam lo hle a ni a ti a. Fur a rei tual tual a, kawngsiam tura hnathawh theihna hun a tlem a, kum khatah thla 5 emaw lek kawng siamna hun a awm tih sawiin hemi thlak nan Mizoram sorkar emaw company dangte pawhin kawng siam hna an thawh tur reng rengah concrete hmanga kawng siam, rigid pavement hman chu sorkar laipuiah dil a ni tih a sawi.
He hunah hian Mizoram sum leh pai dinhmun chungchang leh ram ei leh bar hmasawnna tur hrang hrang te mithiamte kaihhruaina in sawiho a ni a, he hun buatsaihtu, Mizoram Economic Association te hi Mizoram University leh College a Economics Department-a thawktu leh zirlaite telna, economics lama tui apiangte tel theihna pawl a ni.
