He thu hi vawiina Aizawl Sipai lammuala Independence Day vawi 78 lawmna hunah sawiin Chief Minister chuan mipui tana tha ber tur ngaihtuah chungin sawrkar chuan hna a thawk chhunzawm sel dawn a ti a, Mizo mipui beisei ti hlawhtling turin theihtawp an chhuah zel dawn a ti a, sawrkar chak, langtlang leh hmasawnna tura an intiamna tih hlawhtlin chhunzawm zel an tum a ti. Pu Lalduhoma chuan state economy leh sum dinhmun chawikang turin hmabak tam tak a awm a ti a, sawrkar din tirh atangin sum dinhmun sawh ngheh a siamtha turin hma an la tih sawiin sum hman ral leh sum hmuh inbuktawk turin sum enkawl dan felfai tak neih leh inrenchem chu chhunzawm zel ani dawn tih a sawi. Chief Minister chuan Bana Kaih hnuaiah sector hrang hrang tihchak ani dawn a ti a, kuthnathawktute tharchhuah leisak te leh a sawngbawl dan ngaihtuah ani zel dawn tih sawiin kutkawih eizawnna leh thiamthil zirna chawisam bakah thalaite tana eizawnna nghelnghet siam chu an tum zel dawn a ti bawk. Pu Lalduhoma chuan ruihhlo do chhunzawm zel anih theih nan hmalak ani dawn a ti a, kumin chhungah ruihhlo cheng vbch 66.82 zet man ani tawh tih sawiin Mizoram Liquor Prohibition Act 2019 leh a kaihhnawih dan hman mek chu siam danglam hret tum ani tih a sawi bawk.
Chief Minister chuan ramri depa dan phalloh thil ngawrh taka do chhunzawm zel tum ani a ti a, Remna hmun tiha hriat ni ṭhin Mizoram chu remna leh muanna a awm chhunzawm zel theih nan hma an la zel dawn a ti a, ramchhung leh ram pawn hmun hrang hranga cheng Mizote hmakhua ngaihtuah zui turin CM office ah Zo Diaspora Cell din ani a ti bawk. Chief Minister chuan Sorkar langtlang leh tha siam kawnga hmanraw pawimawh tak ni tura din online portal – Mipui Aw kaltlangin mipuiin an lungawi lohna an thlente rang taka chhan a, chinfel sak a ni mek a. Tun dinhmunah zawhna, vuivaina leh harsatna chinfelsak tura ngenna 182 lo lut tawhin, chung zinga 147 chu chinfel tawh a ni a ti bawk. Chief Minister chuan thalai 10,000 chuang ten eizawnna tha an neih theih nan sorkar laipui hmalakna nena tangkawpin thiam thil chi hrang hrangah zirtirna an pe a ti a, infiammite zinga hmabak eng tak nei ten hmanraw tha an neih theihna turin theihtawp an chhuah tih sawiin Olympic 2036 a lo thlen chuan Mizo thalaite pawh kan tel ve ngei theihna turin kan infuihin hma an la mek a ti bawk.
Pu Lalduhoma chuan Healthcare scheme thar leh huam zau tak – Universal Health Care Scheme, mipui zawng zawng, sorkar hnathawkte leh pensioner-te pawh huam vek tur chu ngaihtuah mek a ni a ti a, Healthcare Bill rei tak tak lo tang tawhte chinfel thuai chu ngaih pawimawh chhunzawm a ni dawn a ti bawk. Chief Minister chuan state chhungah hmasawnna project kalpui anih hmain hlawkna a thlen tur leh environment a nghawng dan turte buk hmasak zel a ni dawn a ti a, environment nghawng chi reng reng project chu forest clearance tellova kalpui phal an ni lo tih a sawi bawk. Vawiina Independence Day lawmna Aizawl Sipai lammuala neih ah hian parade contingent hrang hrang 27 an awm a, heng zingah hian armed contingent 7 leh unarmed contingent 6 an awm a, school contingent 12 awmin Band party 3 an awm a ni.
