India hmarchhak state thalaite’n eizawnna tlak thiamna chi hrang hrang an neih theihna tura a bik taka hmalakna atana bul tanna “Pilot initiative for special intervention for promotion of Apprenticeship in North Eastern Region (NER)” chu vawiin khan ATI Auditorium, MINECO-ah Mizoram Chief Minister Pu Lalduhoma leh Union Minister of State for Skill Development and Entrepreneurship Pu Jayant Chaudhary ten a rualin an hawng.“Pilot initiative for special intervention for promotion of Apprenticeship in North Eastern Region (NER)” hi Prime Minister Narendra Modi duhthusam “Viksit Bharat, Viksit Northeast” tihhlawhtlinna atana hmalakna peng pawimawh tak ni tura beisei a ni a, he programme kaltlang hian India hmarchhak state 8 a Industrial Training Institute (ITI) 109 chu tihchangtlun tur a ni ang a, hmarchhaka Micro, Small and Medium Enterprises (MSME) ten trade hrang hranga an mamawh ang zat thalai hna thiam tak chhawr tur an neih bakah, hmarchhak piah lama thawn chhuah tur thalai thiamna bik nei tam tak chher chhuah tum a ni. He special intervention kaltlang hian ITI hnuaia thiamna zir thalai an pun beisei niin trade/sector hrang hrangah hmalak tum a ni a, a tul anga dah belh a ni bawk ang. He hmalakna hi hmarchhak thalai, anmahni state ni lo hmarchhak state dang emaw hmarchhak pawn lam state dangah emaw zir duh mi 26000 velin an chhawr tangkai beisei a ni bawk a, hemi atang hian cheng vaibelchhe 43.94 ruahman a ni a. heng thalai thiamna zir tura thlanchhuahte hian thlatin stipend an dawn tur awm sa Rs. 1500 bakah Rs. 1500 dang chu PM-NAPS kaltlangin an zir chhung zawng an dawn belh dawn bawk a ni.
Hei bakah hian Apprenticeship leh traditional clusters chungchanga mipui zirtirna kawnga hmalakna turin cheng vaibelchhe 4 dah turin ruahmanna siam a ni bawk a, Indian Institute of Entrepreneurship (IIE), Guwahati leh National Skill Development Corporation (NSDC) ten hma an la ang a, IIE Director kaihhruaina hnuaiah monitoring committee din a ni bawk ang. He hunah hian Chief Minister Pu Lalduhoma chuan thu sawiin Union Minister of State for Skill Development and Entrepreneurship Pu Jayant Chaudhary-a’n Mizoram a rawn tlawh chu lawmthu hrilhin, Mizoramin skill development leh entrpreneurship lama nasa taka hma a lakna pawh a cho phur hle in a ring tih a sawi a, Mizoram mipui za a sawmruk (60%) chu thalai kum 35 hnuai lam an ni tih sawiin kaihhruaina tha leh dik nen a hmalak a nih chuan Mizoram mai nilo, India ram economy than zelna kawngah pawh kan thawhhlawk thei hle dawn a ni a ti. Union Minister of State for Skill Development and Entrepreneurship Pu Jayant Chaudhary pawhin India hmarchhakah hian talent a awm bakah thalaiten theihna (potential) sang tak an nei tih India sawrkarin a hria a, data kan neih atangte a kan han en hian India hmarchhaka thalaite theihna hi a nih tur angin kan la cho chhuak lo tih kan hriat avangin a bik taka hmalak a tulin kan hria a, a bul tanna atan ‘pilot initiative’ kan la a, hei hi Prime minister pawhin a ngai pawh hle a ni a ti a, amah ngei pawhin he hmalakna hi uluk taka a vil reng dawn thu leh a regular taka review meeting neih a nih thin tur thu a sawi a ni. Skill Development leh Entrepreneurship sector ah India ram hmundang aiin hmarchhak stateah hmeichhiate an tel tamin an che tha hle tih an hriat thu sawiin entawntlak a ni a ti a, hei hian phurna leh chona nasa tak a pek thu a sawi bawk a ni.
Vawiin programme ah hian National Skill Development Corporation (NSDC) leh Welspun Living Limited (WLL) ten Textile sector-a hmarchhak thali 1000 thiam thil zirtir bakah hna an hmuh sakna tur atana inremna (Memorandum of Understanding) ziahna an inhlan tawn bawk a ni. “Pilot initiative for special intervention for promotion of Apprenticeship in North Eastern Region (NER)” hawnna ah hian Home Minister Pu K. Sapdanga, LESDE Minister Pu Lalnghinglova Hmar, Nagaland MLA Moatoshi Lungkumer, Advisor, Labour, Employment & Skill Development ni bawk bakah MSDE officials te, hmarchhak state hrang hrang atangin thali thahnem tak an tel a ni.
