Mizoram Chief Minister Pu Lalduhoman Save the Riparian in Tlawnglui leh a fintu thenfai hna thawktu Save the Riparian hnathawh chuan sorkar a kaiharh a ti.Vawiin khan Sports & Youth Services Department NSS Cell leh Save the Riparian pawl ten Tuikual lui thenfai hnatlangpui an ko a, hetah hian Chief Minister Pu Lalduhoma chu a tel a, Thusawiin Chief Minister chuan, Tlawng luiah hian zanah Len a din thin avangin a bawlhhlawhzia a hmu a, hei vang hian Tlawng leh a fintu lui thenfai tha a ti hle tih a sawi a, rilruin a vei reng laiin tlawmngaipawl Save the Riparian an rawn lang a. An hnathawh chuan sorkar a kai harh a, mimal tak pawhin a tiphur a, chuvang chuan a tel tel ve ta a ni, a ti.
Engmah phut nei lova thalai tam tak an hnatlang thin chu hmuhnawm a tih thu leh a chhuan thu a sawi a, an hmalakna chuan mipuite tiharh zel se, bawlhhlawh a hmunah chauh paih tawh thin se a duh hle a ni, a ti. He hnatlangpui hi Pu Lalnghinglova Hmar, Sports Minister chuan a telpui bawk a, thusawiin, Save the Riparian te hnathawh chu a chhuanawm a, Mizoram a takin an hmangaih a ni tih a hmuh theih a ni a ti a, mipuite pawh harh thar se, faina hi nghet takin nunpui se a ti.
Vawiin hnatlang hi Save the Riparian leh Sports & Youth Services Department NSS Cell ten an huaihawt a ni a. Zirna in sawm atangin NSS mi zanga (500) vel an thawk chhuak a ni. Save the Riparian te hian an hmalakna thawhkhatnaah Aizawla Model Veng leh Mission Vengthlang inrina lui, Sakhisih chu ni 20 chhung an lo thian tawh a. A thawh hnihna hi Tuikual lui hnarah tan lehin vawiin hi a ni 13 na a ni a. Ni 30 chhung an theih chen thenfai an tum ang.
