Vawiin khan Chief Minister Pu Lalduhoma chuan Zoram Medical College (ZMC) a Girls’ Hostel thar leh Post Graduate Degree in Public Health zirna thar a hawng. A hawnna inkhawm ZMC Conference Hall-a buatsaihah Chief Minister chuan, vawiin hi ZMC mai ni lo, Mizoram tana ni chhinchhiah tlak, hmasawnna hmel thar duhawm tak kan neih ni a ni. Mizoramin Medical College kan neih chhun hi a hlu hle a, kan mamawh medical professionals tha kan chher chhuak tan ta. Kum 2018 a zir tan MBBS batch hmasa ber te kumin kumtirah an graduate fel tawh a, batch pahnihna zirlai 97 ten intern an ti leh mek a. Zirlai 480 dangin an zir mek bakah batch thar admission pawh tih leh mek a ni. Khawvel thang zel leh mipui pung zelah hriselna lama mithiam kan mamawh tam tial tial a. Chung kan ramin a mamawh te kan chherchhuahna hmun pawimawh chu a ni. Kumtin doctor thar za vel in rawn chhuah zel chuan kan indaih chho ve tial tial dawn tih pawh a chiang a ni. Post Graduate Course thar kan han hawng thei pawh hi a ropui hle mai. ZMC-in hma lam a pan zel tih a takin kan hmu. Sawrkar chuan a ngaihthah ngai dawn lo che u a, zirna in tha zawk leh lian zawk a nih theih nan a theihna apiangah hma a la zel ang. Tin, ZMC a thawkte hi sawrkar leh society angin thuang hnihin in kal tih kan hria a. In zavaia sawrkar ta in nih theih dan tur kan ruahman mek a, Council of Ministers neih leh huna lo chhawp chhuah kan tum. In hmunhmate ka fang kual a, mamawh tam tak a la awm tih ka hmu.
A bik takin Dialysis lama mamawh te, Cardialogy lama manpower kan mamawhzia te kan hmu. Tunah hian 50 bedded Critical Care Block, PM-ABHIM scheme atangin sak kan tum mek a. In mamawh dangte pawh a theih angin kan ngaihtuah zel ang, tiin, ZMC tana central sawrkar thuneitute a lo dawr tawh dan chanchin te a sawi a ni. Girls’ Hostel building thar, Curie’s Ladies Hostel tia a hming vuah hi Ministry of DoNER, NESIDS OTRI sum Rs. 10 crore hmanga sak niin a tirah khum 80 awm theihna tura duan a ni a. Amaherawh chu khum 84 dah theih tura sak zawh a ni thung. Mess, Kitchen leh common room te a nei a. Mizo chhiar dana chhawng ruk a sang niin, floor area zawng zawng belhkhawm hi 2519 sqm (27115 sqf) a ni. A sak chhung hian kum hnih leh thla kua a awh a, Mizoram PWD te sak a ni. He hostel thar leh hostel lo awm tawhsa khum 202 te nen ZMC ah hian a vaiin Girls’ Hostel khum 282 a awm tawh dawn a. Ti hian hmeichhe zirlai zawng zawng te khum mamawh hi pek theih deuh vek beisei a ni. Girls Hostel sak rual chiah hian Boys’ Hostel sakna tur pawh hmuh a ni a. Boys’ Hostel sakna tur hmunhma hi tlema siksawi hlek a nih avangin peih fel a la ni lo deuh thung.
ZMC a Master degree zirna hmasa ber tur Master of Public Health hi vantlang hriselna lama mithiam bik chher chhuahna tur niin, National Health Policy, 2017 in a ngaihpawimawh em em a ni a. Mizoram University hnuaia kalpui tur niin kum tin zirlai paruk (6) zel zir theihna tur leh kum hnih chhung zir a ni. A zir man hi kum khatah cheng nuaih hnih (Rs. 2 lakh) vel chauh a ni a. A batch hmasa ber tur zirlai paruk te admit fel tawh an ni. Heng ZMC hmasawnna lian pahnihte hawnna inkhawmah hian Dr. Vanlalsawma Pachuau, Principal Director, Health & Family Welfare chuan kal khawmte lawmna thu a sawi a. Rev. J. Lalbiaknia, ZMC Chaplain chuan hunserh hmangin Er. Hrangthanga Zote, CE, PWD chuan Hostel chungchang technical report a pe. A tirah khum 80 awm theihna tura duan ni mah se loading deck chu double room-ah siam a nih leh tak avangin khum 84 a awm ta a ni, a ti. Prof. Manoj B. Patki, HoD, Department of Community Medicine chuan Master of Public Health Course thar chungchang technical report a pe a. Zirlai hmasa ber turte hmelhriattirna a nei bawk.
ZMC ah hian kum 2018 August thla khan MBBS Batch hmasa ber ten zirna an tan a. Kumin kumtir khan mi 97 ten tha takin an zo va, kum 2019 batch zirlai 97 ten tunah hian intern an ti ve leh mek. Anni bakah hian 2020 atanga 2024 inkar batch hrang hrang zirlai 480 an awm mek a, batch thar admission pawh tih mek niin seat 100 awmah zirlai 85 admit fel tawh an ni. Chief Minister hi Pi Baryl Vanneihsangi, bialtu MLA leh Dr. Malsawmtluangi, bialtu Corporator leh official pawimawh ten an tawiawm a. Dr. John Zohmingthanga, Director, ZMC chuan lawmthu sawiin inkhawm a khar a ni.
