Vawiin khan Ronpur, Assam-ah Thangram Indigenous Peoples Movement (TPIM) leh MZP General Headquarters tangkawpin an buatsaih Thangram Cultural Meet 2026 chu neih a ni a. Chief Minister Pu Lalduhoma chuan khuallian niin a hmanpui.Kumin Thangram Cultural Meet hi a vawi hnihna a ni a, thupuiah, “Unau kan ni” tih chu hman a ni.Thusawiin Chief Minister chuan, history kan en chuan Cachar phaia khawsa hmasate chu Biate leh Hrangkhol te an ni a. Thangram pawh hi AD 1490 velah Ranglong, Sakechep, Hrangkhol, Molsom, Chorei leh Kaipeng hnamten an lo luah tawh a. British an lo lian a, an inkarah indonate a lo awm a. Vawiina Thangram kan han tih bik Langkaih phai leh Singla phai mel 180 biala zau hi kum 1867 khan ramri kham fel tak neiin British leh kan pipute khan inremna an siam ta a ni.Ramriin min dai dan mah se hnam ri chu kham theih a ni lova, ram hranah te, state hranah te awm mahila, unau kan nihna te, hnam khat kan nihna te hi uar takin kan lantir zel dawn nia.
Inpumkhatna lama hmalakna kawngah Thangram mipuite in thawhhlawk hle a. In unau, tanpui ngaite tana vehbur in khawn dan te, Press Release siama in unaute thlavang in rawn hauh thin dan te pawh kan lo hre ve zel a. In chungah Mizoram mipuite pawh kan lawm a ni. Kan hnam huikhawmtu lian leh tangkai YMA te, MZP te leh kohhran te, kan tlawmngaipawl dangte kaltlangin nghet takin invuan tawn zel ang u.Zofate huikhawm a, a tul anga tanpui zel hi kan sorkar duh dan leh kal dan a ni a. Khawvel huapa kan inhuikhawmna tur Mizo Diaspora Cell chu CM office-ah kan din tawh a. Hna pawh an thawk nasa a, mi tam tak an tanpui tawh a ni. Chutiang rilru putu sorkar chuan Thangrama kan unaute pawh hi a ngaihthah ngai lo vang che u. In tana dan hnuaia tih theih kan neih te chu kan ti zel dawn a. Fahrahin kan kalsan lo vang che u, a ti.Tun hnaiah kan thenawma Zofate delh chin ramah harsatna a thleng hlawm a. Heng, kan chunga harsatna lo thleng te hi Pathian remruatna anga lo thleng, kan thatna tura a rawn tirh a ni lovang tih kan sawi thei lo. Engkim ti thei kan Pathianin hna a thawh chuan, theih loh reng reng hi a awm lo a ni. Chuvang chuan, a malsawmna kan dawn theih nan, “A ram leh a felna” zawng zel ang u.
Tin, Hriatna leh thiamna hi hmanraw hriam tak a ni a. Lo uar zel ang che u, tia chahin duhsakna a hlan a ni.Pu K. Vana Chorei, President, Thangram Indigenous Peoples Movement pawhin thusawiin, Mizoram Chief Minister meuhin kan ram a rawn tlawh hi a ropui a, hetiang taka ram hruaitu lianin min tlawh hi kan la hre ngai lo. Kan ram tana ni chhinchhiahtlak a tling. Tunah chuan kan chhehvela hnam dangte pawhin nu leh pa kan nei a ni tih min hmuhpui ta a ni, a ti a. Mizoram mipuite hian hetah in fate kan awm a ni tih hi min rawn hrereng rawh u, a tiInkhawm hi Pu Sanghmingthanga, Vice President, MZP in a kaihruai a, Dr. C. Lalremruata, President, MZP leh Pu F. Lalnienga, Adviser, MZP ten thusawina hun an hmang a. Hnam lam leh zai chi hrang hrang entir a ni bawk.Thangram tih hi Khawthlang ram (Thlang ram) tihna a ni a. Mizo thlang tla hmasate luah ram niin tunah hian khaw 24 vel leh mihring singthum vel an awm mek a. Heng rama cheng zo hnahthlak hnam parukte hian Thangram Indigenous Peoples Movement dinin kawng hrang hrangin hma an la mek a ni.
