Vawiin khan Bharat Mandapam, Pragati Maidan, New Delhi-ah Taiwan External Trade Development Council, India bultumin Taiwan Expo, 2024 India neih a ni a. Chief Minister Pu Lalduhoma chuan khuallian niin a hmanpui.
Thusawiin Chief Minister chuan, Taiwan ram chuan technology lnnovation lamah entawn tlak takin hma a sawn a, culture ropui leh hmasawn zelna tur remchang tam tak a nei. Mizoram chu Taiwan nena thuk zawka inpawh turin kan inpeih a, India hmarchhak ram, South East Asia ram dang te nena awlsam taka inkalpawh theihna, sawrkar laipuiin Act East Policy a kalpui mekna hmun pawimawh tak kan ni. Tin, Taiwan leh Mizoram hi Tropic of Cancer paltlang ram ve ve, sik leh sa, ei leh in leh kawng tam taka nunphung inang tak nei kan ni. Taiwan Company te Mizorama rawn luta kan rama theihna leh remchang awm te rawn dai dar turin ka sawm a. Ka kaihhruai sawrkar hian Infrastructure lamah leh sumdawnna lamah nasa zawka hmasawn tumin kan bei mek a, in tan kan inhawng a ni, a ti.
India Taiwan Labour Mobility Agreement buaipui mek chu Mizo thalai tam takten an chhawr tangkai a beisei tlat thu te, Mizoram University leh Taiwan ram University pahnih ten MoU an ziak chu tha a tih thu sawiin; tunah ngei pawh Taiwan ramah Mizo aiawh pawl pahnih an zin mek thu te a tarlang a. Mizo thalaite skill development lama kaihruai turin Taiwan Technology Company leh University te chu a sawm bawk.
He Expo ah hian Taiwan Company 120 chuang an tel a ni.
