Tukin khan Chief Minister Pu Lalduhoma chuan Serchhip PWD IB ah Serchhip khawtlang hruaitute nen inkawmna an nei a. Serchhip District Hospital sak hna tan tawh, a sak phung tur her danglam deuh (change of scope) vanga CSR petu PGCIL ngaichanga contractor-in chawlhsan rih a tum chu thlamuang taka hna chhunzawm tura a hrilh thu a sawi. Chief Minister hian Health Minister phone-a biain a chah a ni.
Chief Minister chuan, PGCIL ten CSR min rawn pek hi Rs. 21 Crore a ni a. Chuta Rs. 18 Crore chu a building sakna tur a ni a, a bak zawng chu hmanrua (equipments) leina tur a ni. Nimahsela, district hospital changtlung tak sak nan pawisa dah belh a tul avangin Serchhip Hospital atan hian North East Special Infrastructure Development Scheme – other than road infrastructure (NESIDS OTRI) atangin Rs 65 Crore dah belh tum a ni a. Mahse NESIDS OTRI guideline angin Rs. 50 Crore bak hospital atan dah theih a nih loh avangin Rs. 50 Crore dah a ni ta a ni. Hei vang hian Serchhip hospital sak phung tur hi thlak hlek (change of scope) a lo tul ta a. PGCIL lam hian rem an rawn ti ang em? tih contractor hian han ngaihchan deuh a tum a ni.
Hemi chungchangah hian Chief Minister chuan, “PGCIL lam ngaichanga hun lo khawh ral hi a uiawm tawh avangin sum pek tul awm apiang hi NESIDS OTRI atanga lo pek mai theih a ni a. Contractor hian thlamuang takin hna lo chhunzawm se ka duh. A tul chuan sum hi kan dap belh zel dawn a ni,” a ti.
