Vawiin khan Serchhip DC Conference Hall-ah Chief Minister Pu Lalduhoma, bialtu MLA ni bawk chuan Serchhip District Head of Offices te inkawmna a neihpui. Chief Minister chuan, state level-ah Deputy Secretary chin kan inko khawm tawh a. Serchhipah erawh chuan bialtu MLA ka nihna angin kan thawhho dan tur han sawiho hi ka duh a. Vawiinah kan sawi vek seng lo a nih pawhin a tul hun apiangah in tan biakpawh theih ka ni, a ti. Data dik neih kan duh a, eng department pawhin Data dik tak nei turin tan i la ang u. Land registration fel fai neih pawh a tul em em bawk. Kan district chhunga bank ten CD Ratio tha nei ngei se kan duh a. Chu chu mipuiten hmasawn zel nana kan mamawh a ni. CD ratio nei tha tak tak bank an awm tih kan hriat rualin tan han lak deuh mamawhte pawh kan awm thei a. Kan bank te lo tang sauh sauh turin ka ngen che u a ni.
Ni za inhlawhna lamah Serchhip district hmalakna a tha a, ka lawm hle. Kawng dangah pawh Serchhip hian hmahruaitu nihna kan nei nual. Tun hnaiah 3D Dental Lab hmasa ber kan hawng a, Thenzawlah puantahtute tan QR Code tangkai zawk a hman theihna kan hawng bawk. In hnathawh rah duhawm tak tak kan lo hriat hian kan lawm thin a ni. Cooperative Society Movement hi tun aia uar zawka kalpui tha ka ti a, PACS te pawh hi kan la ngah tawk lo hlein ka hria. I tang zel ang u. Mission Organic Value Chain Development for North Eastern Region kalpui mekah pawh hian chak zawk leh tha zawk a hmalak i tum ang u.
Sawrkar hnathawkte inkarah te, service leh service inkarah te inelna dik lo awm lo se. Mahni hma chauh thlir lovin, kan ram tana tha tur zawk kha kan en tur a ni. Tin, officer ten kan hnuaia thawkte mamawh leh harsatnate kan ngaihthla tur a ni a, kan ngaihven tur a ni. Kohhranah te, tlawmngai pawlah te kan inhmang thin, thil tha tak a ni. Nimahsela, kan hna hi i ngaipawimawh ber zel ang u, tiin officer te hi a chah a ni. Handholding Scheme kalpui turah Handholders training kan kalpui hmasa dawn a. Nangni hi a taka kalpuitu turte in nih avangin a hlawhtlin ngei theih nan progress partner thlan atangin lo fimkhur ang che u. Kan flagship scheme hi hna hmasaah in lo nei zel dawn nia, tiin a chah bawk.
He inkawmhona hi Pu Paul L. Khuma, DC, Serchhip chuan a kaihruai a, Serchhip district administration dinhmun tlangpui a sawifiah a. Chumi hnuah officers te hian an hnathawhna kawnga harsatna an neih te, Chief Minister hnena sawi duh an neih apiangte an sawi a ni.
