Chief Minister Pu Lalduhawma’n Mizorama Myanmar leh India ramri hung leh Free Movement Regime chungchanga Union Home Minister a kawmna ah Mizoram tan beiseina awma a hriat thu sawiin, tun dinhmuna lo helh chiam tul a tih loh thu a sawi. Delhi leh Guwahati tlawha a zin chungchanga nimina thuthar lakhawmtute CM pisa-a a kawmna ah Chief Minister chuan Delhi a cham chhungin sorkar laipui hotulute a kawm thu sawiin, Home Minister Amit Shah chu Myanmar ramri hung chungchang leh zalen taka inkalpawhna Free Movement Regime chungchanga Mizoram ngaihdan a thlen thu a sawi a, hmarchhak state dang te hung mahse Mizoram chu hung rihlo se a duh thu a thlen a, hei vang hian Mizoram tan pawh beiseina a awm nia a lan thu sawiin tun dinhmuna lo helh chiam rihloh tha a tih thu a sawi. Chief Minister chuan ramri hung chungchangah Mizoram sawrkar ngaihdan chu ala ngai reng tih sawiin MNF Sawrkar hmasa in hung an rawt tumin ZNP MLA anih laiin ramri hung duhlo in House anlo chhuahsan tawh a ti a, Zofa hmun hrang hrang ami te rorelna hmun khat hnuaia awm chu an thupui ala ni reng tih a sawi.
Chief Minister chuan ramri hung chungchang leh zalen taka inkalpawhna Sawrkar laipuiin tihtawp an tum chungchangah Mizo mipuite tanrual a pawimawh a ti a, Sawrkar leh tlawmngai pawl hrang hrang hrang bakah mipuiten thlawp tlat turin a duh tih a sawi bawk. Chief Minister chuan Assam Chief Minister Himanta Biswa Sarma nen Mizoram leh Assam ramri chungchang sawiin an inhmu a ti a, ramri chungchang chingfel turin theihtawpa hmalak dun an rel a ti a, a tu ve ve pawhin ramriah buaina siam loh ni se an duh thu an sawi dun bakah hun remchangah Assam Chief Minister chuan ramri chungchanga sawi turin Mizoramah aiawh tirh a tum thu a hrilh tih a sawi bawk.
Chief Minister chuan Union Minister of State, Ministry of Minority Affairs John Barla pawh hmuin, ram hmasawnna tur mamawh a thlen a ti a, Vanapa Hall sak thatna tur project atan cheng vbc 37 DPR siam a nih thu te, Aizawl Bypass siamna tur atana lungphum Prime Minsiter in phum se a duh tih a thlen thu te a sawi a, Sairang leh Kawnpui inkara 4 Lane kawngpui laihna tur project cheng vbch 1742.11 chu sanction nghal ani tih a sawi bawk.
