Vawiin khan Chief Minister Pu Lalduhoma chuan Mizoram chu ziak leh chhiar thiam vekna state-ah a puang a, India ramah Mizoram chu ULLAS hmalakna hnuaia ziak leh chhiar thiam vekna state hmasa ber a ni. A puanna leh lawmna inkhawm MZU Auditorium-a buatsaihah hian Pu Jayant Chaudhary, Union Minister of State for Education leh Dr. Vanlalthlana, Education Minister te chu khualzahawm an ni. A hawnna thu a sawiah Chief Minister chuan, Mizoram tana hun chhinchhiah tlak, Mizoram chanchina hriatreng tawh tur mellung hlu tak kan phun a. He dinhmun kan thlen theih nana thawktute zawng zawng chungah lawmthu ka sawi. Mi pahnih khat te thawhrimna zara lo thleng a ni lo va, ram hmangaihtu, rim raka thawk mi tam tak te zara thleng kan ni. An zinga pawimawh ber chu ziak leh chhiar thiam nih duh a, kum upat hnu pawha la zir leh hram hram – kan thian mi 1692 te an ni. Tuna zir leh kher tul ti rih lo kan thian dang te pawh kan hre reng a, an rawn zir duh hun nghakhlel takin kan lo thlir a ni. Vawiin hi literacy campaign kan tihtawpna ni a ni lo va, financial literacy te, digital literacy te leh entrepreneur skill tea hmasawn zel tura bul kan tan ni a ni. A hmasa ber state nih hi a chhuanawm a, a tha ber nih zui reng kan tum ang. Mizoram hi ziak leh chhiar thiamna state mai ni lovin mithiam tam tak awmna state-ah siam kan tum zawk a. Chu ram kan thlen theih nan chuan mitinin mawhphurhna kan nei theuh va, i tang tlang ang u, tiin ram mipuite a sawm.
Khualzahawm Pu Jayant Chaudhary, Union Minister of State for Education pawhin thusawiin, hun rei tak chhung India rama thil tih theih loh anga ngaih, fully literate state, ti thei hmasa ber in lo ni ta a. A chhinchhiahtlak hle a, ka lawmpui che u a ni. He hun thleng thei tur hian ram hruaitu tha neih a ngai a, hnathawktu tha leh khua leh tui tha neih a ngai. Mizoram chuan a mamawh tinreng in nei vek mai a ni. Skill Development lama in hmalakna te pawh ka rawn hmuhpui che u a, hma khaw eng tak in nei. Sawrkar laipui pawhin skill development lama hmalakna hi kan uar tial tial dawn a, kan ITI te pawh kan thuam tha nasa dawn a ni, a ti. Dr. Vanlalthlana, Education Minister pawhin thu a sawi a, Education department leh a thawhpui institution zawng zawnga thawktute thawhrim rah a ni a. Kan tlawmngaipawl leh kohhran ten an thawh hlawk em em bawk a. An chungah lawmthu kan sawi a ni, a ti. Inkhawm hi Pu Khilli Ram Meena, Chief Secretary chuan a kaihruai a, Mizoramin ULLAS hnuaia fully literate state a thlen dan kalkawng tlangpui sawiin, kal khawmte lawmna thu a sawi bawk. Sorkar laipuia Ministry of Education hnuaia Understanding Lifelong Learning for All in Society (ULLAS) hnuaia ziak leh chhiar thiam vekna state ni tur hian state chhung mipui awm zat atanga teha ziak leh chhiar thiam zat chu zaa 95 aia tam nih a ngai a, he tehfung atang hian Mizorama ziak leh chhiar thiam zat chu Periodic Labour Force Survey (PLFS 2023-2024) ah zaa 98.2 a ni ta a. Tun hnaia ULLAS hmalaknaa ziak leh chhiar thiam lo zat zawn chhuahnaah ziak leh chhiar thiam lo chu tlemte an nih tawh avangin ULLAS tehfung atangin Mizoram chu ziak leh chhiar thiam vekna state tia puan theih a lo ni ta a ni.
Mizoram chu ziak leh chhiar thiam vekna state ni tur hian School Education Department-a Samagra Shiksha enkawl, ULLAS hnuaiah Nav Bharat Saksharta Karyakram (New India Literacy programme) tihhlawhtlin hna chu thawh a ni a. Governing Council leh Executive Committee of State Literacy Mission Authority din a ni a, Mizoram sorkar chuan State Project Office Samagra Shiksha Mizoram chu he Programme tihhlawhtling tura thawktuah a ruat a ni. State Literacy Mission Authority tanpuitu atan State Centre for Literacy(SCL) din a ni a, SCERT kutah dah a ni. SCERT chuan Mizo tawngin zirtirhbu a siam a, a hmingah ‘Vartian’ tih a ni. Lawngtlai district-a zirlaite tan English version siam a ni bawk. Zirlaite tana zirtirhbu lak tawi ‘Romei’ tih leh Volunteer Teachers tana kaihhruaina bu ‘Margdarshikha’ tih te SCL chuan a siam bawk. Cluster Resource Centre Coordinator (CRCC) te chu New India Literacy Programme surveyor atan hian hman an ni a. Survey neihna hmuna in tinah lutin ziak leh chhiar thiam lo dap chhuah hna hi an thawk a ni. He survey-ah hian kum 15 leh a chunglam ziak leh chhiar thiam lo chu mi 3026 an ni tih hriat a ni a, chung zinga 1,692 chu zir thei dinhmuna ding, zir duh an ni tih hriat a ni. Samagra Shiksha hnuaia District Project Office-te chuan Volunteer Teacher ni thei tur te an zawng a, Volunteer Teacher ni tura rawn pen chhuak zat chu 292 an ni. Ziak leh chhiar thiam lo awmna hmunah te hian a theih ang angin zirtirna class neih thin a ni a. Sikul, community hall, YMA library leh hmun remchang dangte chu inzirtirna atan hman a ni. Zirlai tlemna hmun tam takah chuan Volunteer Teacher-te chuan an in lamah zirtirna neiin an tlawh thin bawk. Ziak leh chhiar thiam lo zingah thiam belh an lo awm tak avang hian Mizorama ziak leh chhiar thiam zat chu zaa 98.2 a lo ni ta a. ULLAS tehfung atangin ziak leh chhiar thiam vekna state-a puan theih hmasa ber a lo ni ta a ni.
