Vawiin khan Chief Minister Pu Lalduhoma chuan Sairang Horticulture Centre-ah National Bamboo Missions Fund Rs. 252.826 lakh senga din Bamboo Treatment & Seasoning Plant, Bamboo Depot & Godown leh Activated Charcoal Unit (Meihawl siamna) te a hawng. Pu C. Lalsawivunga, Horticulture Minister chu khualzahawm a ni a, Prof Lalnilawma, Minister, RD leh Pu H. Ginzalal, Technical Adviser to CM ten an telpui. Thu sawiin Chief Minister chuan, National Bamboo Mission hmalakna hmanga Mau sawngbawlna thar kan nei ta hi a lawmawm kan ti a. Mau hi kan ramin resource kan neih that a ni a, a chhawr pawh kan chhawr tangkai a. Tunlai mila kan hman thiam zel hian kan economy tithatu, eizawnna tam tak min siamsaktu a ni thei a ni. A treatment plant atanga sawngbawl tawh te hi kum 50 thleng hman theih tura ngaih a ni a.
Mau hmanga thil siam thin te tan a hlu hle ang. Tin, meihawl kan siamna hnar ber hi Thing a ni thin a, thing rawn puitlin hun chhung hi a rei a, Mau erawh chu kum hnih khat lekah an rawn lian leh mai a, a zung nena kan kar a nih loh phei chuan an thi hlei thei lo. Chuvang chuan meihawl siam nana mau kan hman hian kan ramngaw chereu chak lutuk tur kha kan veng a ni, a ti. Chief Minister hian, sawrkar enkawl factory leh plant te hi an dam chhuak tha lo thin hle mai a. Vawiina kan unit hawn pawh hi Department lamin in enkawl phawt dawn a nih hmel a. Tha takin lo enkawl ula, tangkai takin hna lo thawk ngei se kan duh a ni, tiin tha taka enkawl ngei turin thawktute a chah. Pu C. Lalsawivunga pawhin thusawiin, mau sawngbawlna kawngah Mizoram chuan hmasawnna thar kan han nei a. Kan lawmin kan phur hle mai. Kan ramah mau a tam a, kan ram tualto ni lo, a chi dang pawh tunhma atangin kan chin belh bawk a. Kan mau neih te hi tangkai taka hman tumin kan bei zel dawn a ni, a ti.
Pu C. H Lalmuanpuia, Director, Horticulture, Missions Director, State Bamboo Missions chuan technical report a pe a. Mau treatment & Seasoning Plant hi nget thei tawh lo tura mau sawngbawlna a ni a. Sawngbawl tawh chu kum 50 thleng a hman theih dawn ni a sawi a ni. Depot leh Godown hi a dah khawmna a ni a. Activated Charcoal Unit atang hian ni khatah meihawl ton 3 a siam theih a, kum khatah 900 tonnes siam chhuak thei tura beisei a ni. Nitin mau pum 670 vel a mamawh a, meihawl a siam rualin nitin vinegar litre 100 vel a siam chhuak ve nghal zel ang. Hman tlaka distilled hnuah phei chuan nitin vinegar fir tha 54 Litre vel a chhuak thei dawn a ni. Mau chingtu tur hi Zau (cluster) pathum; Chhingchhip, Baktawng leh Saiphal khuaah te din an ni tawh bawk. Heng mau sawngbawlna din kawngah hian North East Cane & Bamboo Development Council (NECBDC) ten technical support an pe a, a enkawl dan training pawh anni hian an pe vek dawn a ni.
