Chief Minister Pu Lalduhoma’n sawrkar tharah mipuiten beiseina thar an nei lian a, sawrkar hnathawkte pawh hna tha thawk turin an inpeih tih vawiina Kulikawn Hospital building thar sakna tur hmun a tlawhna ah a sawi. Pu Lalduhoma chuan nimin khan Kulikawn Hospital building thar leh a kaihhnawih building hrang hrang sakna hmun hi a tlawh a, Kulikawn Hospital complex thar sak a nih theih nana bialtu MLA thahnemngaihna a fak a, Health Minister in a pawimawhzia hria a theihtawp a chhuah bawk avangin damdawi in lian zawk bul an tan thei dawn ta a ti a, Aizawl Civil Hospital-in mipui a dawl zawh tawh loh avang leh mipui nawlpui tan ZMC pan a harsat bawk avangin Kulikawn Hospital hmunah khum 100 awm theihna damdawi in din tum a nih thu a sawi a ni.
Chief Minister chuan, damdawi in satu turte tha tak leh a hun taka zo turin a chah a, sorkar tharah mipuiten beiseina thar an nei lian a, damna a thleng mek a ti a, sawrkar hnathawkte pawh an phur a, hna tha thawk turin an inpeih at vek a, sawrkar pawhin theihtawp a chhuah dawn a ti bawk a ni.
Chief Minister chuan, sorkar laipui kuta ZMC pek tum chhan chu sum dinhmunin a zir loh vang a ni a ti a, hetihlai hian Health Minister in sorkar laipui a dawr hnuah, Mizoram sorkarin a enkawl duh phawt chuan sorkar laipui chuan tanpui a hnial loh avangin ZMC chu sorkar laipui kutah pek a ngai dawn ta lo a ti a, Lengpui Airport erawh hnathawh tawhah sum indaih lohna a nasat avangin sorkar sum neihin a tlin tawh lo a, a enkawl thei te hnenah hlan a ngai dawn ta a ti a ni. He hunah hian Health Minister Pi Lalrinpuii leh bialtu MLA Pu Lalchhuanthanga bakah Chief Secretary Dr. Renu Sharma leh line department hotute an tel a, Kulikawn Hospital Complex thar hi Ministry of DoNER scheme, NESIDS sum Rs 67.63 crore hmanga thawh tur a ruahman a ni.
