Vawiin khan Chief Minister Pu Lalduhoma chuan a office-ah Tripura atanga Mizorama Gas Pipeline phum mektu Indradhanush Gas Grid Limited (IGGL) Chief Executive Officer Pu Subrata Das leh a thawhpuite a kawm a, an hnathawh chinte a sawipui a, an harsatna tawh mekte pawh a ngaihthlaksak a ni.
IGGL thawktute hian he pipe line hi Tripura state Panisagar Receiving Terminal atanga rawn kal tanin Kanhmunah, Zawlnuamah, Kawrthahah, Tuidam leh Darlak paltlangin Mamit bulah a chhuak a. Chuta tangin Lengteah kal zelin Sihhmuiah Receiving Terminal dah tur a ni a. Sihhmu Receiving Terminal atanga Aizawl khawpui chhung Household Connection hi Tripura Natural Gas Corporation Limited ten an thawk thung ang.
Panisagar atanga Sihhmui thleng pipeline hi kilometer 119.5 a thui niin a pipe len zawng hi feet khat bial a ni a. Kum 2027 December thlaa thawh zawh hman an tum a ni a. Tun thlengin welding hma hi zaa 45 an thawk tawh a, a phum hna (lowering) hi zaa 33 an thawk tawh a ni.
He project hi North East Natural Gas Pipeline Grid hnuaia hmalakna niin, Panisagar leh Sihhmui inkar hi phase II hnuaia hmalakna pakhat a ni a. Phase II hmalakna pumpui hian Guwahati – Agartala – Aizawl pipeline a huam a, a vaiin kilometer 723 a thui a ni.
