Vawiin khan Chief Minister Pu Lalduhoma chuan Mizoram Youth Commission, Honda India Foundation leh Honda CSR Implementing Agency Visan Foundation te tangkawpin an buatsaih Hotel Management Training – MYC Hall, MINECO ah a hawng. Training kal chhuak te hian Assessment test an paltlang chuan India rama Hotel changkang ber berah hna an thawk zui dawn a ni. Chief Minister chuan, sum leh pai tumtu Honda India Foundation leh Visan Foundation te chungah lawmthu a sawi a. Mizo thalaite hi theihna nasa tak nei, training leh inbuatsaihna tha zawk siamsaka state pawn leh ram pawna hna tha tak tak thawk thei an ni tih kan hria a.
Thalaite theihna haichhuah a, kan ram economy chawikangtu atana buatsaih hi kan sawrkar thiltum lian pakhat a ni. Chuvang chuan handholding scheme pawh naktuk hian kan hawng dawn a, thalaite theihna chawi kanga, thawkchhuaktu ni tura buatsaihna scheme a ni. Vawiina training kan hawn pawh hi Hotel Management lama tui, kan thalai fel tak tak 39 ten an chhawr dawn a, tha taka in zir a, hotel liana thawk tlaka in inchher puitlin ngei kan beisei. Nangmahnia awm theihna kha ringhlel reng reng suh ang che u, in hlawhtlinna hi kan ram hlawhtlinna a ni. Mizoram hlawhtlinna hi mi pakhatah emaw mi thenkhatah emaw a innghat lova, kan zaa kan tanrualna leh thawh rahah zawk a innghat a ni, a ti.
Pu Malsawmzuala Ralte, Chairman, MYC pawhin thusawiin, tun hnaia MYC in thalaite tana hma an lakna langsar zual te a tarlang. Group A & B coaching hi district pathumah an kalpui mek a, UPSC Prelims tling mi 2 an tanpui a, British Army a luh dilna 240 an thehluhsak tawh a, an zinga hmeichhe pakhat chuan kohna a dawng. Mandarin zir turin Mizo nula pahnih Taiwan-ah an tir mek a, anni hian thalai tam zawk te an zirtir leh ang. NSDC te nena tang hovin Japan rama hna thawk tura thalaite tirh an tum mek. Heng bakah hian hmalakna engemawzat an kalpui a ni.
Pu Satyaprakash Patil, CSR head, Honda India Foundation leh Pi Sangeeta Ranjit, Managing Trustee, Honda India Foundation CSR Initiatives te pawhin thu an sawi. Training hi thla hnih chhung awh tur a ni a, stage pasarih a awm dawn a. Chumi hnuah Assessment a awm leh ang. Chumi paltlang te chuan India rama Hotel changkang ber berah hna an thawk zui thei dawn a ni.
