Chief Minister Pu Lalduhoma’n sawrkarin hmunphiah man a bituk zata lei duh RR Associate ten an lei mai tura an ngaih laiin an beisei ang an phak loh avangin an chesual a ti a, hmunphiah chingtute chu mahni inbuapui mai turin an ti ta tih a sawi. He thu hi vawiina Assembly thutkhawma Land Resources, Soil & Water Conservation Department-a hmunphiah chungchang zawhna lut a chhanna ah sawiin Pu Lalduhoma chuan nakum lam atanga chuan area wise in an kal tawh dawn a ti a, tha zawkin an siam thei dawn tih sawiin support price pek tur pawh nei mahse tun dinhmunah inhralh an awm nual tawh avangin a harsa rih a ti a, hmun tinah society a din loh avangin tun dinhmunah support price inpek a harsa rih tih a sawi.
Chief Minister chuan Old Stock awm mek chu hmunphiah hralh kawngah harsatna a ni a ti a, Advance a lo indawr engemaw zat an awm tih sawiin hmunphiah lei tura vai lo lut lo dang pawl te pawh an awm a ti a, harsatna neuh neuh a awm avangin tun dinhmunah chinfel vek a harsa a ti a, Transit pass tello in Vairengte a pal tlang theihloh avangin Transit pass atan kg 1 ah cheng 1 lak a ngai thin tih a sawi bawk.
Pu Lalduhoma chuan Vote lei nana sawrkar hmasa in alo ruahman ning nawi chu thlai thar lei nan an hmang a ti a, thlai thar dang 3 chu sawrkar rate aia sanga lei tur an awm avangin sawrkarin a lei a ngailo a, hmunphiah ah erawh harsatna hrang hrang sawrkarin a tawk mek tih sawiin hmunphiah ro leina tur rate bituk an nei a ti a, a hring lei turin an intiam lo tih a sawi bawk.
