Chief Minister Pu Lalduhoma chuan kumin September ni 1 atanga tuialhthei man tihsan chu tỉh danglam a ni lova, a ngai anga hman zui tur a ni a ti. Nimina a kaihhruaia Council of Ministers thukhawmin petrol leh diesel man chungchang hi an ngaihtuah a, Chief Minister chuan tuialhthei man chungchang chu an vawithum ngaihtuahna anih tawh thu sawiin diesel leh petrol man pung nasa anga lang chu a pun nasat loh thu leh Covid hmaa rate nena khaikhin chuan diesel-ah chuan cheng 1 leh tlemin to belh mahse petrol-ah chuan cheng 2 leh pawisa pakuain in a tlahniam zawk a ni a ti.
Chief Minister chuan chhiah an lak tur chỉ hnih, social infrastructure and services cess leh road maintenance cess a nih thu sawiin social infrastructure and services cess chu thil pawimawh hrang hrang school tihchangtlunna turin zaa 25, hriselna leh damdawiin hmasawn nan zaa 25, thalai te tan skill development atan zaa 25 leh a dang zaa 25 chu hmeichhia te chawikhanna pual project hrang hranga hman tur a nih dawn thu leh, a hlawkna teltu chu mipuite vek an nih dawn thu a sawi a. Road maintenance cess chu kawng siamna tur liau liau a nih thu a sawi a ni. Sorkarin a tul a ni, mipuite tana hamthatna tur zawk a ni tia ruahmanna a siam chu mipui zawng zawng, pawl zawng zawngin pawmpui thei se tih an duh dan leh an ngenna a nih thu a sawi a ni.
ZPM in chhiah an tipung dawn lo ni a sawi chu, anmahni puhchhiatna mai a ni tih Chief Minister hian a sawi bawk a, tawngkamin emaw ziakin chhiah pun loh tur thu hi an dah lo a ti a, chhiah pun loh tur an sawi chhun chu electric bill a ni a, hei erawh tihpun an tumlo a ti. Hetihlai hian sorkar thutlukna ngaichang mektu NGO Coordination Commiittee leh Mizoram Commercial Vehicle Union hruaitute chuan sorkar thuchhuak hi ngaihtuahin an thukhawm ve leh dawn tih kan corr zawhna chhangin an sawi a ni.
Tuialhthei man sang duhlohna lantira, tihniam tura nawrtu Mizoram Commercial Vehicle Union hruaitute chuan NGO Coordination Committee in tuialhthei man tihniam tura an nawr ve tho avangin anmahni ngaichang tura an tih thu an sawi a. Hetianga sorkar thuchhuak a awm takah hian NGOCC te nena an la thutkhawm leh an beisei thu leh an thutkhawm hunah an kal zel dan tur chu an rel dawn thu an sawi a ni. MCVU hruaitute chuan a bik takin, lirthei lian, truck te tana harsatna a len bik thu sawiin commercial vehicle dangte chuan STA dila an tlan man san mai thei an nih laiin truck te chuan FCI leh Food, Civil Supplies & Consumer Affairs -ah hun bi neia inremna lo ziak lawk vek tawh an ni a. An inremna chu tuialhthei man san hma rate mil vek a nih avangin truck neitu bik tan a harsa zual bik a ni an ti.
