Vawiin khan Chief Minister Pu Lalduhoma chuan Baptist Church of Mizoram Headquarters Office, Serkawn, Lunglei tawngtai inkhawm a hmanpui a. Chief Minister hi Pu K. Sapdanga, Home Minister, bakah Minister dang Pu Vanlalhlana, Pi Lalrinpuii, Pu Lalthansanga, Pu B. Lalchhanzova, Pu Lalnghinglova Hmar te, Pu V. Malsawmtluanga, MLA, T. Lalhlimpuia, MLA leh Pu Lalramliana Papuia MLA ten an tawiawm.
Kal khawmten tawngtairualna an neih zawhah thusawiin Chief Minister chuan, hmanah khan he office-ah hian kan lo leng tawh a, khami tum min tawngtaisak a. Vawiinah hun tha tak min han buatsaihsak leh a, min han tawngtaipui leh a, ka lawm hle a ni. Kan auhla ber chu kan ramah Pathian ram lo thleng se, tih a ni a, kan policy pawimawh bik pasarih zinga a hmasaberah hei hi kan dah thin. Ram hmasawnna hnathawk turin sawrkar, kohhran leh tlawmngaipawlte hi kan pawimawh a. BCM kohhran pawh thlarau lam rawngbawlna baka Education Concern lam te, Orphanage Home te, Ruihhlo ngai enkawlna te, Skill Development lamah te hmalakna tha tak tak in nei tih ka hria a, a ropui ka ti hle. Sawrkar enkawl zirna in te aia kohhran enkawl zirna in te hi kawng tam takah an that zawk fo avangin heng kohhran enkawl zirna inte thawhpuia tanpui dan tur pawh kan dap chho dawn a ni, a ti. Heng bakah hian ruihhlo ngaite enkawl leh ruihhlo do thua sawrkar ruahmanna te sawiin, kohhran hrang hrangten thawhhona tha zawk neih theih zel tha a tih thu pawh a sawi a, MPF awm lohna khuaah chuan MLA candidate te tan campaign-na se so a sang bik thin tih hi a tak ngeiin ka hmu a ni, a ti. BCM kohhran chu a kal zelna turah duhsakna a hlan a ni.
Rev. R. Lalnunzira, AGS, chuan lawmthusawiin Baptist Church of Mizoram kohhranin sawrkar a beisei dan leh a duhsakna te a sawi a. Rorel tura lal ringawt lova, lal bawk hnathawk bawk an nih an beisei thu a tarlang. Sawrkar kal zelna turah duhsakna a hlan a ni. Tawngtai inkhawm hi Rev R. Lalbiakliana, General Secretary, BCM in a kaihruaia, tuktin zing dar 9:30 velah hetianga tawngtai inkhawm hi an neih thin thu te, Headquarters office ah hian thawktu mi 72 vel an awm thu te a sawi. Rev. Dr. R. Lalthanmawia chuan Minister leh MLA te hi kohhran aiawhin thilpek a hlan a ni.
