Chief Minister Pu Lalduhoma chuan vawiin khan Aizawl Civil Hospital-a nau neihna hmunhma (Labour Room leh Maternity Ward) Rogi Kalyan Samiti (RKS) sum Rs. 95.40 lakh hmanga thuam thar chu a hawng.
Chief Minister chuan, Infant Mortality Rate hi ram hmasawnna thlen chin min hrilhtu pawimawh a ni a. UN pawhin Millenium Development Goals ah khan IMR hi tehna pawimawh zingah a telh a ni. IMR hniam ram chu ram him, chenna atana ram ralmuanga ngaih a ni. IMR tha kan neih theih nan hian sawrkar laipui chuan nu nau hring tur zawng zawng te chu damdawiin emaw sub centre ah ngei nau nei thin turin a duh a, hmalakna pawh a kalpui nasaa, chutianga ti te chu nau neih lawmman te a pe hial thin. Naupiang hlim thihna te, nu nau chunga boral an tlem deuh deuh theih nana damdawiinah ngei nau hring tura kan inzirtir rual hian kan damdawiin leh kan nau neihna hmunhma te kan lo thuam that ve zel a ngai bawk a. Aizawl mipui tana pan awlsam leh lun, Civil Hospitala kan nau neihna hmunhma te tihchangtlun a ni hi a lawmawm hle, a ti a. Health Minister leh a thawhpuite, RKS Governing Body chungah te lawmthu a sawi a ni.
Doctor leh medical lama thawktute chu rawngbawlna pawimawh tak chelh tute in nih avangin in thiamna bakah in tawngkam leh chetzia thlenga damlote tana thlamuanpui tham a tling thin. A pantu apiangten lawm taka an chhuahsan zel theih nana theihtawp lo chhuah thin ang che u, tiin a ngen a ni.
