Vawiin khan Chief Minister Pu Lalduhoma hovin Sawhthing Slice Dry kalpui mek chungchang sawihona neih a ni.Tunah hian MAMB hian Local entreprenuer sawm leh pathum te chu Sawhthing Slice Dry kalpui turin a thawhpui a. Anni ho nena chak zawka kal dan tur leh an inbunna tur zar pharh dan te an sawi. Mizorama processing unit rawn din duh, India ram chhung leh ram pawn firm paruk te chungchang an sawi bawk a, heng firm te mamawh hi hriatsak a, an inbun duhna hmun te hriata, a tul anga chak taka hmalak an rel a. A umzuitu tur bik committee an siam nghal.
Tun hnaia Bangladesh-a sawhthing market chungchang ngaihvena kal, Society pakhat report pawh meeting-ah hian an thlirho a ni. Sawhthing lei tawh chin report ngaihthlak a ni bawk a. Notified crops palite lei nan sawrkarin MAMB ah Rs. 62.599 Crore dah tawh a. MAMB hian sawrkarah Rs. 20 crore an dil belh leh mek. DAMC lama third release thlenga pawisa pek tawh chu Rs. 58,08,00,100 a ni.
Sawhthing lei tawh zat hi 1,13,627 quintals a ni a, a then hi direct purchase, a then support price hmanga lei an ni. An hralh lehna atangin MAMB hian Rs. 6,34,63,875 a hmu let ve tawh thung. Meetingah hian Pu PC Vanlalruata, Agriculture Minister, Pu F. Rodingliana, Industry Minister, Dr. KC Lalmalsawmzauva, Adviser to CM leh official pawimawh te an tel.
