Chief Minister Pu Lalduhoman kalphung thar, mipui sawrkar din kawngah sawrkar hnathawkte chu sawrkar innghahna ruhrel an ni. Vawiin khan Chief Minister Pu Lalduhoma hovin Minister te, Advisers to CM te leh Mizoram sawrkara Jt. Director chin chunglam zawng zawng leh DC leh SP zawng zawng te telna Inter Departmental Meeting Dawrpui Multi Purpose Hall ah neih a ni a, he hunah hian thusawiin Chief Minister chuan tuna an kal mek dan aia tha zawk kal dan tur hria an awm phawt chuan ziakin a hnenah thlen se a ti a. Mizoram First tih chu an thupui a ni a, thil tha lo hnawl ngam, a tul huna “No” ti ngam an mamawh a ti.
An sawrkar chuan mipuite aw ngaihthlak zel a duh avangin “Mipui Aw” online an nei a; CM office atangin an vil reng a, a mawhphurtuten tha takin kalpui se a ti a. Eirukna tihbo an duh a, sawrkar hnathawk leh consultancy firm inthurual te, supplier thurualpui neih te eirukna bul a ni fo a, an khauh hle dawn, a ti a. Sawrkar hnathawkten Annual Property Returns a hun takah file ngei ngei tur a ni a, a tel lovin vigilance clearance an pe dawn lo a ti bawk a. Hnathawh quality tha chauh neih an tum avangin Project Monitoring Committee chak tak an nei a, officer zawng zawng ten tha takin an thawhpui a ngai a ni a ti.
Departmental work reng reng a changtu Minister phalna la hmasa lova thawh phal a ni lo tih Chief Minister chuan a sawi a. Department ten eng project pawh kalpui tum se Planning leh Finance department kaltlang lova proposal thehluh phal a ni lo a. K deposit ah pawisa dah a tam em em a, kum 3 leh a aia upa k deposit reng reng department ten ching fel thuai turin an duh tih a sawi bawk.Sawrkar hnathawk semrual dan pawh an dap mek tih Pu Lalduhoma chuan a sawi a, allocation of business pawh siam that an tum a. Service inepna nasa lutuk chuan thawhhona a tichhe nasain an hria tih a sawi a ni.He hunah hian Chief Secy Dr. Renu Sharma, chuan Sawrkar thar duhdan leh hmalakna te, a ruahmanna tlangpui te a sawi a. Sawrkar hnathawk kal tura beisei te tha takin an kal tih a sawi bawk a ni.
