Vawiin khan Chief Minister Pu Lalduhoma hovin a office-ah Aizawl Sustainable Urban Transport Project (ASUTP), Project Readiness sawihona neih a ni a. UD & PA Minister Pu K. Sapdanga leh official pawimawhte an tel. Pu K. Sapdanga chuan thuhma sawiin, Aizawl khawpui zau chho zel mila khawpui chhung inkalpawhna tur ruahmanna an siam dan a tarlang a. A senso hi Asian Development Bank loan tinzawn niin, state sorkar tana hautak lutuk lo tura duan a ni, a ti.
Pu Lalmalsawma Pachuau, Secretary, UD & PA chuan ruahmanna an siam tlangpuite a tarlang a. Lengpui Airport huamin, Aizawl tlak lam pangah mihring chenna a zau thla zel tura ngaiin, Muallungthu atanga Sihphir huama khawpui inkalpawhna (Urban Mobility) an ruahman te, Kulikawn leh Bawngkawn inkar corridor leh Junction tihhmasawnna te, Temple atanga Vaivakawn kawngpui leh a chhehvel tihhmasawn leh junction siam that te, Aizawl tawntirh hmun pathuma Truck, Bus leh Maxi Cab terminal lian siam te, kawngpui thlan bik pahniha EV Bus tlantir a, chung bus te chawmtu tur EV feeder Bus khawpui chhung kawng thlan bika tlantir te a tel.
Heng bakah hian Chief Minister-in dah tel atana tha a tih project thenkhatte dah belh leh a ni ang.
