Lok Sabha inthlan 2024 atana Mizoram tana Expenditure Observer pakhat Pu Arvind Sharma chuan vawiin khan candidate te sum viltu Expenditure Agent-te chu DC Office Conference Hall, Aizawl ah kawm in, candidate te campaign na atana sum dah chu dik leh langtlang taka chhinchhiah a vawng turin a chah a ni. He meeting hma hian Election Expenditure Monitoring Asst. Nodal Officer Pu Lalhruaizela Fanai chuan Expenditure Agent-te chu sum vawn dan hrang hrang zirtirna a neihpui bawk.
Pu Arvind Sharma chuan tun inthlanpui ah hian Mizoram a MP candidate te’n an sum hman theih chin – cheng nuai 95 chu an hmanna uluk leh dik taka chhinchhiah a pawimawh thu a sawi a. A theih ang chen chena political party/ candidate tu tan pawh ang khata inelna hmun siam a nih theih nan he expenditure limit hi siam a nih thu leh, voter te’n anmahni duh ngei vote theilo a sum leh therlo hmanga an duhthlanna tihbuai sak an nih loh nan expenditure monitoring a pawimawh thu a sawi a. Expenditure Observer chuan ECI in sum vil leh endik danah inkaihhruaina uluk tak siamin, thil thup leh dan kalh a thiltih awm hmuhchhuah a nih chuan ECI chuan na takin hma a lak theih bawk thu a sawi.
Chutihrual chuan expenditure agent te’n hriatthiam loh leh harsatna nei tan Observer leh Expenditure Monitoring Nodal Officer te leh accounting team te chu engtik lai pawhin anmahni pui tura an inhawn reng thu a sawi. Agent-te chu dan bu bel chiang turin leh a, India ram democracy humhimna atan an pawimawh a ni tih hre turin a chah a ni. Expenditure Observer hova meeting ah hian Election Expenditure Monitoring Nodal Officer Pu K. Lalrohlua leh Asst. Nodal Officer Pu Lalhruaizela Fanai leh Accounting lam official dangte an tel bawk.
