Mizote Kut pui ber leh ngaihhlut ber Chapchar Kut lawmna Aizawl Lammual ah hman mek a ni a, kut thupui atan zonun ze mawi – inremna tih hman a ni.
Chapchar Kut lawmna pui ber Aizawl Lammual ah hian kut ngaihlu lawm tura kal mipui pawh an thahnem hle a, khua a duai a, ruah sur tur a intham nasa hle chungin mipui kalkhawm te boruak erawh a zangkhaiin an hlim hle a ni..
Kut Pa Chief Minister Pu Lalduhawma chuan he hun hmang tura kal zawng zawngte chu Chapchar Kut chibai bukin, abik takin hnamdang he kut hmang tura lo kal te chungah lawmthu a sawi a, Chapchar kut chu kan pi leh puten eizawnna bul an tanna, an kumthar in tanna a ni a ti a, a hma atangin kut sa te zawngin chhungtinin sa hmeh an tum a, hemi ni ah hian inhau an awih ngai lo a ti a. Chutiang chu pi leh pute lo hman thin dan a nih avangin kumin Chapchar Kut thupui atana zonun ze mawi – inremna tih an thlang chu kan pi pute lo hman thin dan nen a inhmeh hle a ti.
Chapchar Kut chhim tu zingah hnamdang an thahnem hle niin kan corr chuan a sawi a, thenkhat Chapchar Kut la hre lo te pawhin an lawm hle a, kumdangah an thiante hruaia lo kal leh ngei an tum thu an sawi a ni, a ti.
Chapchar kut 2026 lawmna pui berah hian Cheraw kanpui YMA Branch 97 atang cheraw kanpui bu za leh pasarih neih a ni a, hei bakah hian kut pual in a vawi khatnan Chief Minister chawimawina no pui mi pa 5- Lemziak thiam Lalhmingmawii, Auto Rickhsaw khalhtu rinawm Henry Lalhmingmuana, Nungcah humhalhtu Pu V.L. Bela, Entrepreneur hlawhtling John Lalrinchhana Zahau, Naupang zaithiam Esther Hnamte te hnenah hlan a ni a, Hlado chham, Cheraw Kanpui, pawnto, Lengkhawm zai, Parlam, Pipu Zai, Lemchan, thla koh, mizawn inchuh, mal zai, pipu zai, zavai chai-Lera zai, khuallam te leh Mizo hnam thuam leh Mizo infiamna te entir a ni.
