Vawiin khan Nature Conservation Centre (NLC)-Mizoram, EF & CC Department buatsaihin ‘One Day Workshop on Nature Conservation and Climate Resilient Livelihood Opportunities (Fish Farming)’ chu CF Auditorium, EF & CC Complex, Champhai Bethelah hlawhtling taka buatsaih a ni. He workshop ah hian Champhai district huam chhunga khaw hrang hrang atangin fish farmer mi sawmsarih (70) vel an tel a ni.
He workshop-ah hian Pu Lalbiakchama Chawngthu, Champhai DFO & Member Secretary, NLC Advisory Board chuan Wildlife Conservation & Impact of Climate Change tih thupui hmangin zirtirna a pe a, Mizorama nungcha kan la neih te humhalh an pawimawh zia leh Mizoram biodiversity chu kan thil hlu ber te zinga mi a nih avangin nasa zawka humhalh a pawimawh zia a sawi a. Wildlife Protection Act, 1972 chungchangah mipuite hriat tur pawimawhte zirtirna a pe bawk. Hei bakah hian ramngaw kan tih chereu avanga harsatna kan tawh langsar tak mai tuihna tlem tial tial chu pumpelh turin ramngaw humhalh a pawimawhzia uar takin a tarlang a ni.
Pi Lalrosangpuii, Champhai DFDO, Fisheries Department chuan Serious Fish Farming tih thupui hmangin zirtirna a pe a, sangha khawi chungchanga hriat tur pawimawh chi hrang hrang zirtirna pe in, composite fish farming chungchang te, farm pond chi hrang hrang leh kan ram tualto sanghate humhalh turin luidung humhalh a pawimawh thu a tarlang bawk a ni. Tin, fish farming chu tih takzeta kalpui a nih chuan eizawnna hlawk tak a ni thu a tarlang. Tin, kalkhawmte hnenah fish farming chu taima leh serious zawka kalpui theuh turin a sawm bawk a ni.
