Vawiin khan Champhai Road Protection Squad-te chuan Zotlang Village Council huamchhung NH-06 Zotlang – Khankawn panna kawngpui nek zawnga hmalakna awm nia sawi leh tuihawk luankawr ṭha tawk lo te a hmunah an enfiah a. Road Protection Squad te hi an Chairman Pu Ngulzaṭhuama, SDO (S) hovin an thawkchhuak a ni.
He hunah hian Road Protection Squad te hian Zotlang- Khankawn kawngpuia hmun hrang hrang, heng Zaluti Filling Station, Vavu Dil peng, Dinthar Veng peng, Pi Thanchhumi Godown bul, Pu C. Vanlalhmuaka, Pu Laldawngliana Varte leh Pu H. Rotanga te ram bul te an en a. Kawngpui a tlo zawk theih nan a hmalak dan tur hrang hrang te an enho a, tuihawk luan kawr mumal lohna lai te thawmṭhat dan tur leh kawngpui nek zawnga hmalakna te tihtawp dan tur te an sawiho bawk a ni.
He hunah hian Champhai Road Protection Squad member – P&E, PWD, Transport, UD&PA, LAD, LR&S, I&PR, Sub Hqrs YMA leh NGO Coordination Committee aiawhte bakah Zotlang Village Council aiawhte an tel a ni.
