Nimin khan Champhai District Mizoram Journalist Association te chuan Annual Conference vawi 36-na Champhai Press Club-ah an hmang. He hun hmanpuitu Adviser to Chief Minister (Technical) Pu Ginzalala chuan Champhai District Hospital tih changtlunna tura sawrkar hmasain hma a lo lak tawh chu tha takin an chhunzawm dawn tih a sawi a. Doctor indaihlohna phuhru turin sawrkarin ruahmanna a siam mek zel thu pawh sawiin, thingtlang mi te harsatna chhawk zangkhai turin Primary Health Care tih changtlun a tul nia a hriat thu a sawi bawk.
Tourism hmasawnna atan Aizawl leh Champhai District chhungah Swadesh Darshan 2.0 kal pui a nih tur thu sawiin, he mi atan hian Champhai District-ah khualzin tam thei ang ber hruai lut turin mipuite pawh inpuahchah a tul a ni, a ti a. Commerce & Industries Department hnuaiah Skill Development tih hmasawnna turin Mizoram sawrkarin cheng vaibelchhe 37 a nei mek tih a sawi a, Champhai thalaite tan a tam thei ang ber hnuh luh a tum thu a sawi bawk. Mizoram sawrkar policy lian ber te zinga mi – ‘Ban a kaih’ (Hand Holding Policy) kalpui dan tur chu peihfel thawkhat a ni tawh a, Planning Department kaltlangin kal pui a ni dawn a ni, a ti.
Pu Ginzalala hian Champhai Greater Water Supply Scheme thawm tha turin ruahmanna siam mek a nih thu te, Truck Terminal sawrkar hmasa atanga buatsaih tan chu peihfel thuai a nih a beisei thu te, Auditorium changtlung tak sa tura tender chhuah mek a nih thu te a tarlang bawk.Champhai District MJA Annual Conference vawi 36-na ah hian kum 2024-26 chhunga District MJA hruaitu tur an thlang a. District I&PR Department staff ten inthlan hi an buaipui a ni. Champhai District MJA hruaitu thlan chhuah thar te chu – President: Pu Lalhlupuia Vice President: Pu C. Lalhnunpuia Treasurer: Pu C. Lalrinsanga te an ni a. Inthlanna hi District I&PR Department Staff ten an buaipui a ni.
