Vawiin khan India ram hmun dangte rualin Champhai Fire Station te chuan Fire Service Day/Martyrs’ Day an hmang a. Kum 2024 chhunga kangṭhelhnaa nunna chan kangṭhelh pawl mi 20 te sunna hun an hmang a ni. Kum danga lo tih tawh ṭhin dan angin April 14 aṭanga April ni 20 chhung hian Fire Service Week hman zui a ni dawn a. Fire Service Week pual hian Champhai Fire station-te chuan sikul thlan bikah Fire Safety Campaign Cum Mock drill leh damdawiin thlan bikah te Fire Safety Inspection an nei ang a.
Kangmei a chhuah thulha Fire Station biak pawhna sticker a tam thei ang ber an sem chhuak bawk ang. Kumin Fire Service Week thupui atan ‘Kangmei lakah kan ram a him nan, i ṭangrual ang u(Unite to ignite,a fire safe India)’ tih hman a ni. April ni 1, 2024 leh March ni 31, 2025 chhung khqn Champhai Fire Station hian Fire call vawi 19 dawngin – in,thlâm kângah leh electrical fire-ah vawi 4; dâi hnai kang- chenna in tana hlauhawmah vawi 15 an tlan chhuak a ni. He mi hun chhunga bungraw kang ral hlut zawng hi cheng vaibelchhe 1.63 (₹1,634,450)a ni.
Kumin 2025 January aṭanga vawiin thleng hian dâi hnai kâng,chenna in tana hlauhawm tak takah vawi 15 lai Champhai Fire Station-te hi an tlan chhuak tawh bawk a ni. Tunlaiin khua a sangin a lum hle a, Champhai Fire Station Officer, Pu F.Lalchhandama chuan mipuite kangmei laka fimkhur turin min ngen a. Kangmei a chhuahin Champhai Fire Station biakpawhna – 03831 234026 / 7628029288 ah te hriattir vat zel turin mipuite a ngen bawk a ni.
