Champhai District Basketball Officials (CDBBO) buatsaih Champhai District Basketball Association (CDBBA) recognised tournament, JK Business Services Inter-Veng Junior Basketball Tournament on Ruihhlo Do chu vawiin chawhma dar 11:00 khan District Bawrhsap Pu James Lalrinchhana, Chairman, District Sports Committee (DSC) ni bawk chuan khuallian niin Vanlallawma Indoor Stadium (VANIS), Kahrawt Vengah a hawng. He hunah hian Addl. DC Pu K. Zorammuana, Ex-Vice President, MBBA, Pu R. Lalbiakzuala, President, CDBBA leh Pu F. Lalrinmuana, President, Sub-Hqrs. YMA Champhaite chu khualzahawm an ni.
Khuallian District Bawrhsap Pu James Lalrinchhana chuan ruihhlo do kawnga hmalakna kaltlanga JK Business Services Inter-Veng Junior Basketball Tournament buatsaih a ni chu lawmawm a tih sawiin, a hlawhtlin theih nana hmalatute bakah main sponsor JK Business Services-te thahnemngaihna fakawm tiin, khawtlang tana luangchhuak zel turin a sawm a. Ruihhlo laka fihlim hmasak chu ruihhlo do kawnga hmalak bultanna a nih thu sawiin, ruihhlo do kawnga Sub-Hqrs. YMA Champhai thlawpna lawmawm a tih thu a sawi a; mahni maiin ruihhlo a do hlawhtlin theih lova, kan zavaia tanrualna avang chauhin kan do hneh thei a ni, a ti. Thinlung atanga ruihhlo do a pawimawh thu leh hei hian ataka hmalakna a hrin chhuah thu sawiin, thalai infiammi kalkhawmte chu ruihhlo do kawnga theihtawp chhuahpuiah a sawm a, hun vawn dik ngaipawimawh lehzual turin a chah nghal bawk.
Pu James Lalrinchhana chuan sawi chhunzawmin, ramri depa awm Champhai District chu ruihhlo tawlhna kawng a nih avangin ruihhlo engemawzah District chhungah thlauh a nih thu leh ruihhlo chu ngaihthah mai mai theih a nih loh thu a sawi a. Hun hman that leh hun bi vawn dik chu nunkawng hrisel zawh nana pawimawh a nih thu tarlangin, hun kan hman thata kan vawn dik phawt chuan ruihhloin kan nunah hmun a chang dawn lo a ni, a ti a. Thalaite chu taksa leh rilru hriselna bakah thlarau nun chena ngaipawimawh turin a chah a. Infiamna chuan inunauna leh inhmelhriatna tha zawk, game-a hmasawnna leh tanlakna thar thlen se a duh thu sawiin, tournament hlawhtling tak buatsaih a nih theih nan duhsakna a hlan a ni.
Thusawitu dang Pu F. Lalrinmuana, President, Sub-Hqrs. YMA Champhai chuan sual dona kawnga thalai engemawzat an pen chhuak chu lawmawm a tih thu sawiin, infiamna hmanga ruihhlo do chu YMA in a thlawp tlat thu a sawi a. Taksa hriselna chuan rilru hriselna a siam a, hei hian sual dona kawngah min pui thin a ni, a ti a. Thalai kalkhawmte chu khawtlang leh ram tana mi tangkai ni tura theihtawp chhuah turin a sawm a. Ruihhloin kan ram a run mek dante tarlangin, thalaite chu ruihhlo laka fihlim tur leh a ti thin leh zuar thinte awt miah lo turin a fuih a. Basketball Tournament buatsaih chuan ruihhlo dona kawngah rah tha a chhuah ngei a beisei thu a sawi a, tournament tanpui nan Rs 15,000/- a hlan nghal bawk.
