Khawtlang tana thawktu, Ruatfela Nu ti a hriat lar Pi Vanramchhuangi chuan tun hnai a an buaipui Aizawla Chakma nupa kutdawhte chungchang chu tun kar chho hian a buaipui zui dawn thu a sawi. Assam Rifles biakin bula kutdawh a thu thin Chakma nu pakhat chu Krismas hma khan Pi Vanramchhuangi te hian an lo buaipui tawh a. Mi tlahlangte enkawlna hmun Aizawl Tlangnuam venga Shakti Sadan hmunah an dah a. Natna benvawn leh inkaichhawn theih a vei avang leh tharum thawh zawnga chet a chin avangin Shakti Sadan thuneitute an buai hle a. Kut dawh ve tho a pasalin a ngenna angin chhuah a ni.
Hetah hian Aizawl khawpui a kut dawh lo tur leh an khua a haw tura intiamna an ziah hnan vek hnu-ah Department of Women & Child Development (WCD) thuneitute remtihna-in an inhruai chhuak a. Mahse, tun hnai-ah Aizawl khawpui-ah bawk kut an dawh leh tih hriat a ni a. Pi Vanramchhuangi chuan a tul angin dan hmanga kalpui zui a tum thu a sawi. Chakma nupa hi hun engemaw chen Aizawl khawpui-ah kudawhin an awm tawh a. A nupui zawk hi dam lo leh chak loh hmel tak a nih avangin Pi Vanramchhuangi te hian tute’n emaw kut an dawh luihtir a nih an ringhlel a. Rangvamual atanga phur chhova tlai lama dah leh thin taxi neitute pawh an chhui thleng a, mahse, taxi khalhtute hian tihsual an neih awm hmuhchhuah a ni lo.
A pasalin a ngen nasat avang hian Shakti Sadan atang hian chhuahtir a ni a. Mahse, an thutiam bawhchhia-in Aizawlah kut an dawh leh ta tih hria-in bawhzui an tum a. Hnamdang kutdawh an tam tak em avangin kutdawh khapna dan siam a tul thu sorkarah pawh an thlen tawh niin Pi Vanramchhuangi chuan a sawi a ni.
