Centre for Environment and Social Justice (CESJ) chuan solar plant atana village council (VC)-te hnena ram an dilna hnûk kîr turin Power & Electricity department an ngen. CESJ chuan, Mizorama solar power dinhmun ngun taka an zir thu tarlangin, Mizoram khaw hrang hranga VC-te hnena an ram chhunga solar plant hmun tur dilna lehkha kumin February ni 19-a an tih chhuah tawh chu a rang lama hnûk kîr turin P&E department an ngen a ni.
Public private partnership (PPP) mode-a solar power siam chhuah a, power purchase agreement ziah belh chu kawlphethaa Mizoram intodelhna kalkawng pawimawh ber ni loa an hriat thu an sawi a. CESJ chuan, PPP mode-a power siam chhuahna leh siam tumna hmun hrang hrang – Vankal, Tlungvel, Keifang, North Vanlaiphai, Thenzawlte leh hmalakna tura inremna awm sate chu enfel hmasak an duh a. Solar power chu chhûn lamah chauh hman theih a nih avangin zan lamah phai atangin kawlphetha lak reng a ngai tho niin an sawi.
CESJ tarlan danin, PPP mode-a kawlphetha siam chhuah a, sorkarin a lei lêt leh tura inremna siam chu a man a sang a. Kawlphetha siam chhuah atangin unit khat Rs 4 leh pawisa pangain an lei a, chu ai chuan India Power Market (Indian Energy Exchange Limited)-ah a man ngai emaw, tláwm zawka leiin environment humhalhna a ni nghal dawn niin a sawi bawk.
