Kumin Lok Sabha inthlanpui lo awm tur atan India ram hmun hrang hrangah inpuahchah mek zel a ni a, Mizoramah pawh inpuahchahna hi ngawrh taka kalpui mek zel a ni. Assistant Returning Officer (ARO) te puala buatsaih ‘Certification Programme’ chu vawiin khan Aijal Club Conference Hall-ah Mizoram CEO Pu Madhup Vyas-a chuan a hawng.
Kan hma lawka Lok Sabha Inthlanpui neih tur atana ARO te puala buatsaih Certification Programme hi February ni 5 atanga ni 9 chhung awh tur niin, hemi hun chhung hian National Level Master Trainer (NLMT) mi panga te’n thupui thlan hrang hrang hmangtein zirtirna an pe dawn a.
Training zawh hian ARO te hian exam an hmachhawn dawn a ni. Lok Sabha inthlan atan hian Aizawl DC chu Returning Officer (RO) a ni dawn a. DC dang zawng zawngte leh Addl. DC, Aizawl District-te chu Assistant Returning Officer (ARO) an ni ang.
