Kumin inthlanpui General Elections to the Lok Sabha, 2024 neih dan tur chungchangah vawiin tlai dar 5:30 khan Chief Electoral Officer (CEO) Pu Madhup Vyas, IAS chuan I&PR Auditorium-ah Press Conference a nei. CEO Mizoram Pu Madhup Vyas chuan Election Commission of India (ECI) in a puan angin Mizoram Parliamentary Constituency chu general election phase 1-ah a awm thu a sawi a, April ni 19, 2024-ah Mizoram MP (Member of Parliament) election neih tur a nih thu leh June ni 4, 2024-ah vote chhiar a nih tur thu a sawi. Gazette notification chhuah ni atan March ni 20, 2024, inthlan chuh tum hming pek luh ni hnuhung atan March ni 27, 2024, nomination scrutiny (enfiahna) ni atan March ni 28, 2024, candidate inhnuhdawh theih ni hnuhnung atan March ni 30, 2024 ruat a nih bakah June ni 6, 2024 hmaa inthlan kaihhnawih zawhfel vek hman tum a nih thu a sawi. He inthlanna hi mipui tana thil pawimawh a nih vangin vote thlak thei apiang chu vote thlak vek turin a fuih a, media lam mite inthlanna felfai tak neih a nih theih nana tih tur leh tih loh turte tam thei ang bera puangzar turin a chah bawk.
Tun inthlan atana electoral roll hnuhnung ber (final) chu February ni 8, 2024-ah tlangzarh a ni a, mipa 4,14,777, hmeichhia 4,41,520 leh service voter 4,980 an awm a, Mizoram pumpuia vote nei zat chu 8,61,277 an ni. Vote nei tamna ber district chu Aizawl (2,88,268) niin, an tlemna ber district chu Hnahthial (16,257) a ni thung. Vote nei tamna ber Assembly Constituency chu 36-Tuichawng, Lawngtlai District (36,493) niin an tlemna ber Assembly Constituency chu 34-Thorang, Lunglei District (15,152) a ni. Mipa za zela hmeichhe awmzat chu 1064 a ni a, Mamit District-ah chauh hian hmeichhe vote nei aiin mipa vote nei an tam zawk a ni. Youth voter (kum 18-19 inkar) hi 36,214 an awm a, senior citizen (kum 85 leh a chunglam) hi 4,758 an awm. Vohbik vote nei (Persons with Disability electors) hi 3,399 an awm bawk.
Polling station (vote thlakna) hi 1,276 siam a ni a, kum 2019 Lok Sabha General Election aiin 101 in a tam zawk a ni. Polling station zawng zawngah hian Commission thupek angin Assured Minimum Facilities (AMF) chu dah vek a ni ang a, mamawh chi hrang hrang bathroom hmeichhia leh mipa hman tur te, vohbik tana ramp (dawhsan) te leh thil tul dang dah vek a ni ang. Hmeichhe hlang enkawl leh vohbik hlang enkawl tur polling station pakhat ṭheuh constituency tinah a awm ang. Model Polling Station pakhat tal constituency tinah siam tum a ni a, Commission thupek angin Critical Polling Station zawng zawngah leh Polling Station zawng zawng zatve aia tlem lovah vote thlak lai lo vilna turin webcasting tih tum a ni bawk. Postal ballot/home voting hi vohbik leh senior citizen ten an duha an hman theih turin ruahman a ni ang.
Tun inthlan hi eco-friendly elections a puan niin party leh candidate-te chu single use plastic hmang lo tura ngen leh a chah an ni. Inthlanpui venhimna thawk turin State Police mi 3000 chuang leh Central Armed Police Forces (CAPF) company 15 vel an duty ang. Election sum hman viltu tur team hrang hrang ruat an ni a, ruihhlo leh a kaihhnawihte khauh taka ven tum a ni bawk. Addl. Chief Electoral Officer, Mizoram kaihhruaina hnuaiah State Level Media Cell din a ni a, Media Centre changtluang tak CEO office-ah a din a ni a, advertisement thlithlai leh pre-certification ti turin Media Certification and Monitoring Committees (MCMC) din an ni bawk. Inthlan buaipuitute hnenah training ṭha leh mumal tak pek a ni a, SVEEP (Systematic Voters’ Education and Electoral Participation) chu mi cheng vil zual ngaihna hmun (vulnerable community)-ah hman tum a ni. EVM leh VVPAT model thar ber M3 hman a ni dawn a, mamawh ai tam ruahman hial a ni. Mamawh palh atana rang thei ang bera damdawi in panpui thei tur Air Ambulance ruahman a ni bawk. Model Code of Conduct hi inthlan puan a nih chiah atangin hman nghal tur a ni a, party leh candidate zawng zawngin ṭha taka zawm vek tur a ni. CEO hi Dr. H. Lianzela, Addl. CEO, Pu James Lalnunmawia, Jt. CEO leh Election Official dangte’n an ṭawiawm a ni.
