Vawiin chawhnu dar 2 khan Central YMA chuan India ram chhung leh rampawna thalai hnathawk tur thawn chhuak thin Employment Agency te an Office ah kokhawmin ramdanga hnathawka chhuak te harsatna tawh chungchang leh thawhho dan turte an sawi pui. Inkawmhona hi Pu Lalhmachhuana, CYMA President in a kaihhruai a, Agency hrang hrang aiawh mi … an kal. Agency hrang hrangte hi Mizo thalai hnathaek tura ram danga an thawn chhuah dan kalhmang leh harsatna an tawh te an sawi a, ramdanga hnathawka awm ten harsatna an tawh dan te pawh sawi lan a ni bawk. Agency te hian Mizoram Sawrkarah Deputy Commissioner ( DC) kaltlangin License an neih thu leh The Mizoram Private Placement Agencies (Regulation ) Act, 2015 hmanga hnathawh thin a nih thu an sawi.
Central YMA hruaitute chuan Mizo thalai engemaw zatin ramdangah hna thawk tura an kal theihna tura Agency te hnathawh leh Mizo thalaiten eizawnna an nei thei chu lawmawm an ti a. Chutihtualin rampawn a hnathawk thalai harsatna tawk ten an hnenah harsatna an thlen thin thu an sawi a, hemi avanga inkawmna hi buatsaih a nih thu an sawi. Agency te chu Document dik tak hmang a hnathawk tur thawn thin tur leh kum tling lote thawn lo turin an ngen a, an thawn chhuah te pawh en zui zel tur leh an harsatna te chin fel kawngah mawhphurhna la zel thei turin an chah bawk a ni.
Pu Lalhmachhuana, Central YMA President chuan “ Thalai hlawhtling ngei tur leh rintlak te chauh ram pawna hnathawk tur hian thawn thin tur leh fimkhur taka hma la thin turin Agency te a chah a, thalai hna zawng lai ram danga hnathawk turte pawhin mahni nihna dik tak leh document dik chauh hmang turin a chah nghal bawk a ni. A theih angin Central YMA in mumal zawka Agency ten hna an thawh theih dan turah ngaihtuahna an sen tur thu a sawi bawk. Inkawmhonaah hian Central YMA OB dangte leh CEC memberte an tel.
