Central YMA chuan tun hnai khan Mizorama an sahimna atana awm mek Myanmar, Bangladesh leh Manipur atanga rawn tlanchhiate chu Mizorama an awm chhungin ram dan leh khawtlang inrelbawlna zawm turin a ngen. Central YMA chuan ram dan leh khawtlang duhdan bawhchhe lo turin raltlan zawng zawng an ngen a. Ram dan kalha sumdawn leh ruihhlo laka inhnamhnawih lo tur leh khua-leh-tui tha tak anga khawsa tura beisei an nih thu an tarlang. Ramdangmite’n sorkar hriatpui leh phalna lo chuan ram leh in an neih theih loh avangin YMA-in hriatpuina a ziah theih loh thu tarlan a ni a.
In leh dawr luah man chungchangah mi in leh dawr luah lai a aia luah man sang zawk emaw a luahlan leh luahsak loh tur a ni. Myanmar leh Bangladesh atanga raltlante hi India mi an nih loh avangin India mi chauhvin an neih theih Voter ID card, Aadhaar Card, Birth Certificate, Tribal Certificate, Residential Certificate, Indian Driving Licence leh lirthei registration te an ti tur a ni lo, an ti a. Dan phal loh thil leh ruihhlo hmanga sumdawnna do kawngah sorkar leh khawtlang an thawhpui tur a ni, an ti bawk.
Raltlante chu an awmna ngai a, awm reng tura beisei an nih thu leh branch, group leh sub-headquarters YMA hruaitute’n mahni huam chhunga raltlante dinhmun zir chiang a vil reng tura beisei an ni a. Zofate an nih avangin tanpui an ngaih chuan theihtawpa tanpui turin an ngen bawk a ni.
