Mizoram Rural Bank (MRB) chairman ngenna angin MRB Champhai Branch-a sum puktir dana thil dik lo tak awm ni a hriat chu Police-in an chhui hnu-ah Central Bureau of Investigations (CBI) kuta hlan a ni. Thu dawn danin Champhai MRB Branch atang hian KCC account ami chu mi 1,290-te bank account hmangin cheng vaibelchhe 20 leh nuai 64 chuang khatihlai a branch manager khan kum 2021 chho khan a puktir a. Heta pawisa pukte hi Savings Bank account pakhatah chhun luh a ni tih hriat chhuah a ni a. He savings bank account neitute hi Lucas Thangmangliana, PS Zatluanga, T Paulamthanga, Tuangzapauva leh Jacob Thanglianchina te an nih thu MRB hotute chuan an sawi a.
Kum 2022 August thla bul lamah khan Champhai Police Station-ah FIR thehluh a ni a. Police lamin charge sheet thehlut tawh mah se, Bank danah bank sum chingpen chu CBI chhuitir tur tih a awm avangin MRB Chairman ngenna angin kumin February thla laihawl vel khan Lokayukta chuan CBI kutah he thil chhui hna hi a pe ta a ni. CBI lam atang erawh chuan engmah hriat a la ni lo thung. Heta loan an pek chhuah hi rulh a awm lo reng reng ni a sawi a ni a. Inbumna thil a nih bakah MRB hian an hloh nasa hle a ni. Pawisa luh khawmna Savings Bank account neitu zing ami pakhat Lucas Thangmangliana hi mihring sam (hair) hmanga dik lo taka sumdawng zinga telah puh a ni a.
Champhai a a in pawh Enforcement Directorate a thawkte’n an dap a, mahse Lucas Thangmangliana hi Myanmar lamah a lo bibo hman ni a thu dawn a ni. Enforcement Directorate hi Hyderabad atanga Mizoram kaltlanga China a sam hmanga sumdawnna-ah hian Hyderabad a company thenkhat bakah St. Mary’s Gem Industries leh Sun Moon Human Hair Champhai leh Thari Enterprises, Aizawl-te pawh an dap a ni.
