Mizoram State Election Commission chuan Chakma Autonomous District Council huamchhunga Village Council inthlan chu thla leh March ni 12-a neih a nih tur thu an sawi.
Mizoram State Election Commissioner Dr. H Lalthlangliana chuan vawiin khan a pisa-a thuthar thehdarhtute nena inkawmna an neihah he thu hi sawiin vawiin inthlan puan a nih atang hian CADC huamchhungah election model code of conduct kenkawh nghal a nih thu a sawi a, State Election Commissioner chuan CADC hnuaia Village Council chhunga In 50 awm chinin VC seat thum an neih thu leh In 50 atanga 100 inkarin seat 5 an neih thute bakah In 101 atanga In 150 in seat 6 leh In 151 atanga a chunglamin seat 7 zel an neih theih thu te a sawi bawk.
Mizoram State Election Commission tarlan danin CADC huamchhunga Village Council-a ding turte hming pek luh hun hnuhnung ber atan tun thla February ni 19 ruat a ni a, hming pek luh te endikna hun atan February ni 21 ruat a nih bakah hming pe lut inhnuk kir duhte tan February ni 24 thleng hun pek an ni a. CADC hnuaia Village Council-a vote tla te hi vote thlak ni vekah chhiar fel a ni dawn a, vote thlak that ngai a awm a nih chuan vote thlak tuk March ni 13-ah neih that leh tura ruahman a ni a, March ni 17 a VC tinte inpeih fel vek tura tih an nih bakah a tuk March ni18-ah VC thlan leh a kaihhnawih pawh zo fel vek tura ruahman a ni bawk.
