Central Young Chakma Association (CYCA) chuan Bangladesh Chittagong Hill Tracts a Dighinala Sadar leh Rangamati khua ami Chakma mi 9 lai thah an ni chu an dem thu an sawi. Inrinni khan CYCA hian thuchhuah siamin kar kal ta Ningani khan misual rualin Chakma mi 9 that-in chenna in leh Buddhist biakin 100 vel an hal a. Mi engemawzat an hliam bakah chenna in chhuahsan engemaw zat an awm niin an sawi. Hemi chungchangah hian India rama Chakma pawlte chuan Prime Minister Narendra Modi hnenah ziaka thu thlenin Dr Mohammed Yunus-a kaihhruai Bangladesh sorkar lailawk nena inbiakna buatsaih rih lo turin an ngen a.
An lehkha thawnah chuan mi 9-in nunna an chan thu leh in 100 chuang hal a nih thu hi an tarlang a. Bangladesh sipaite chuan hetianga Chakma mite laka tharum thawh lai hi an thlir mai mai niin an sawi. Lehkhathawnah hian Chakma Development Foundation of India dintu Suhas Chakma, Chakma Autonomous District Council CEM Rasik Mohan Chakma, minister hlui leh National Commission for Scheduled Tribes member Nirupam Chakma leh Assam leh Tripura a Chakma hruaitu mi 6-in an hming an ziak a ni.
An lehkha-ah chuan Bangladesh Chittagong Hill Tracts a tlangmi chengte himna atana awmze nei a hma lak a nih hma chuan India sorkarin Bangladesh sorkar nena inlaichinna tha pangngai kalpui lo se tih an phut niin an tarlang a. Khawvel ram hrang hrangte pawh Chittagong Hill Tracts a tlangmite tihduhdah leh rahbeh an nih chungchang hi auchhuahpui a, Bangladesh sorkar hi thunun turin an ngen a ni.
