State Election Commission ruahmanna hnuaiah vawiin khan Chakma Autonomous Distrrict Council ah Village Council inthlanpui neih a ni a, hriattheih chin ah Vote 74.19 a tla a, report dawnkim a nih hunah vote tlazat hi la danglam tura ngaih a ni. Tukin zing dar 7 atangin mipui ten vote an thlaka, tlai dar 4 thleng Vote thlak theih hun hawn niin, tihtur tulte tihfel a nih hnuah Returning Officer te kaihhruaina hnuai ah Vote tlate chhiar nghal a ni a, inthlanna buaipuituten an tihtur an tihfel hnu ah Lawngtlai an pankhawm nghal ang.
CADC huamchhungah hian Village Council – 88 awmin, General Seat 428 awmin, Reserved Seat 88 nen CADC ah hian VC Seat 516 a awm a, Candidates – 977 awmin heng zinga 826 chu General Seat niin, Reserved seat chuhtu 151 an awm a. Mipa vote nei 19,162 leh hmeichhia vote nei 18,721 awmin, a vaiin vote nei 37,883 an awm.
CADC a Village Council inthlanpui neih ah hian Village Council paruk ah chuhtu awmlovin BJP Candidate te an tling a, Village Council pakhat ah Reserved seat chu chuhtu awmlovin BJP Candidate in a la bawk.
