Food Civil Supplies & Consumer Affairs Minister Pu B.Lalchhanzova’n buhfai lei nana sorkar sum hloh tih tlem nan, ration card var nei thenkhat te man tlawm zawka buhfai lei thin tih tawp an tum tih a sawi. He thu hi vawiina Aizawl Press Club-a Mizorama Ration Card kalpui dan chungchanga chanchinbumite a kawmnaah Minister hian a sawi a. Minister chuan card var tana sorkarin buhfaia subsidy a pek thin chu ennawn an tum a, Card var chu chi hnih-a then an tum thu sawiin, card var nei mi neinung tak ni si te chu sorkarin subsidy a a pek thin chu tihtawp ni se an ti a ni.
Ration Card var nei mi neinung zawk te chu sorkarin cheng 34 a lei chu cheng 34 tho a pek chhuah a, card var pakhat zawk nei te erawh kg ah 34 a lei a nih chuan cheng 27 a khulhtir tura an duan thu sawiin, thutlukna erawh an la siam rih lo a, card dang te pawh ennawn a, mipui ten an dinhmun a zirin card dik kawl a, an dikna leh chanvo an hmuh ngei theih nan Ration Card chu ennawn ngei an tum tih Pu B.Lalchhanzova chuan a sawi a ni. Supply Minister chuan thla khata sorkarin buhfai mana senso a hmuhlet loh chu Cheng Vbc 13 leh Nuai 47 a ni tih sawiin heta tang hian subsidy a sum sen thla khata Cheng Vbl 3 vel tala tih hniam an tum thu a sawi a ni.
Minister chuan National Food Security Rules March Ni 1, 2016 atanga Mizoram State in a hman tan atangin tun dinhmunah Ration Card nei hi chhungkaw nuai 2 sing 8 & 6,362 awmin, hengte hi card Eng, card Pawl leh card Var ah te then a ni a. January 2024 a buhfai leina senso a hman zat chu cheng vbc 15 nuai 69 sing 2 & 7,944 a ni a, heta subsidy a senso zat chu cheng vbc 7 nuai 47 sing 5 & 8,271 ani a, a phurh vel naah ah Vbc 6 vel sen a ni a, hmuh let leh loh tura buhfai mana senso chu Vbc 13 Nuai 47 a nih thu a sawi.
