Nimin khan Mizoram Board of School Education chuan Higher Secondary School Leaving Certificate result a ti chhuak a. Exam zawng zawng mi 11,824 zinga 9227 an pass a, pass percentage hi zaa 78.04% niin nikum aiin 0.62 in a hniam.
Vawiina result tihchhuahah hian Arts Stream ah Linden Lalremruatpuia, Oikos Hr Sec School chuan mark 500 ah mark 471 hmuin pakhatna a ni a. Commerce Stream ah David Lalhminghlua, St.Pauls Hr Sec School in mark 500 ah 460 hmuin Pakhatna a ni a, Science Stream ah Lalramdina Ralte, St Pauls Hr Sec School chu mark 500 ah 477 hmuin pakhatna a ni bawk.
Result tihchhuah anih velah hian MBSE Chairman Pu JH Zoremthanga chuan MBSE Conference Hall ah chanchinbu mite a kawm a. Result tluang taka a chhuah theih chhan chu Hr Sec School zirtirtute inpekna vang ani tiin Education Department pumpui tanrualna vang ani tih a sawi.
Kumina HSSLC result chhuakah hian compartment 52 an awm a, heng naupangte hian admission an tlai lohna turin compartment exam hi buatsaih thuai an tum thu leh HSSLC result complaint hun chu result chhuah atanga ni 7 anih thu MBSE Chairman Pu JH Zoremthanga chuan a sawi bawk.
HSSLC result chhuakah hian exam beitu 11824 an awm a, Arts Stream ah 8467, Science Stream ah 2807 leh Commerce Stream ah 549 awmin pass zatah mipa aiin hmeichhia 679 in an tam zawk a ni.
HSSLC result chhuakah hian candidate zawng zawng pass vek sikul hi Arts ah 54, Science ah 2 leh Commerce ah 6 a awm a. Candidate zawng zawng fail vekna sikul hi Arts ah sikul 2, Science ah sikul 2 leh commerce ah sikul 1 a awm bawk.
Kumin atang hian NEP zulzuiin subject pakhatah chauh exam that (improvement) ti duh tan a kum leh nghah ngai lovin Compartmental exam rualin an exam nghal thei tawh dawn a ni.
