Lok Sabha Inthlanpui, 2024 a Champhai District huamchhung Assembly Segment (AS) 3, 23-Champhai North, 24-Champhai South leh 25-East Tuipui Assembly Segment-a vote tlate chu vawiin chawhma khan boruak muanawm leh felfai tak hnuaiah chhiar zawhfel a ni. Vote chhiar kalpui dan hi Election Commission of India (ECI) in a ruat Counting Observer Pu Souvik Banerjee, SCS, West Bengal (2002) chuan vilin a enfiah a ni.
Vote chhiar tura inpuahchahna hnuhnung ber atan tukin dar 5:00 khan Counting Observer kaihruaiin vote chhiar buaipuitu tur Counting Supervisor 30, Counting Assistant 30 leh Counting Micro-Observer 32 an duty-na tur theuh Asembly Segment theuh Counting Table-a semrualna, Final Randomization of Counting Officials chu NIC Conference Hall, DC Complex-ah neih a ni a. Counting Observer-in Micro-Observer-te dar 7:00 ah meeting a neihpui a, zing dar 7:30 ah political party aiawhte hriatpuina hnuaiah Strong Room 3 te endika hawn a ni a, zing dar 8:00 atangin Champhai District chhung Assembly Segment pathuma vote tlate venhimna khauh tak hnuaiah chhiar a ni.
Counting Hall tinah hian counting table 8 theuh siam a ni a, heng zinga pakhat hi VVPAT chhiarna VVPAT Counting Booth (VCB) niin, vote tlate hi round 4 ah chhiar zawhfel a ni a, CU a vote tlate chhiar zawhfel hnu hian Assembly Segment tina Polling Station pawhfuh 5 a VVPAT Slip-te VCB ah chhiar a ni a. Counting Table tinah hian Counting Supervisor, Counting Assistant leh Counting Micro-Observer pakhat, an vain mi 3 zel an awm a. Assembly segment tinah hian reserve team 2 zel awmin an ni hian VVPAT Slip an chhiar a, Postal ballot hmanga vote tlate chu RO thutchilh Aizawlah chhiar a ni. Vawiin vote chhiarnaah hian Presiding Officer-te pawh mamawh thulha biakpawh thuai theih tura koh tel vek an ni.
