Chief Minister Pu Lalduhoma’n Myanmar ramri hung leh zalen taka inkalpawhna tihtawp dodalna Official Resolution House ah an pu lut dawn tih a sawi. He thu hi vawiina Larsap Larsap Dr Hari Babu Kambhampati an Assembly thutkhawm tannia a thusawi sawiho na ah sawiin Pu Lalduhoma chuan ramri hung leh FMR tihtawp chu a duhlo takzet tih sawiin hemi dodalna Official Resolution put luh ani dawn tih a sawi. Pu Lalduhoma chuan Larsap in sawrkar hmalakna tur a chhawpchhuah chu tha anti tlang hle tih a sawi a, Mizorama la awm ngailo Investment Policy an buatsaih a ti a, ram dang atang leh ramchhung hmundang atangin Mizorama investment ti duh ten an dawr thin tih a ti a, Mizorama sumdawnna bultan duh te pawhin ramchhung mi te eizawnna ti chhe lo zawngin bul tan tir an tum dawn a ti a, Chapchar Kut lo thleng turah sawrkar hrang hranga Ambassador te lo tel an duh tih sawiin hma an sawn chho mek tih a sawi. Chief Minister chuan ZPM Sawrkara cheng khat hlawh chu a sawrkar hmasa cheng khat hlawh aiin Mizoram tan a tangkai zawk dawn tih sawiin sawrkar hmasaa sum sen ralna tullo thenkhat te siamthat mek zel ani a ti a, a heklo thei ang berin kal an tum tih a sawi.
Pu Lalduhoma chuan Mizoram ah Contract kal lai bill la tawh si hna la thawk si lo tam tak an awm a ti a, mi 30 bawr vel an awm tih sawiin ZPM Sawrkar ah chuan hetiang hnathawk lo an awm ve dawnlo tih a sawi. Opposition Leader Pu Lalchhandama Ralte chuan Larsap thusawia Hriselna chungchanga sawrkar hmalak tumna awmlo chu pawi atih thu a sawi a, hmasawnna engkim a kal dawn chuan mi chengte hriselna a pawimawh thu sawiin tarlan a nilo chu pawi a tih thu a sawi a, Larsap ina a sawi zinga pawimawh lar khel lo tura a fawng vuan tute an a chah chu zawm ngei atana tha ani tih sawiin heng bakah hian fir taka sum hman chu a ngaipawimawh a ti a, sawrkar inrenchem kum anih laia sum hmanna tul lemlo tak hmuh tur awm chu pawi atih thu sawiin Adviser to CM mi panga leh OSD to CM mi 2 bakah thil hrang hrangah ruat thar awm te chu sum ren ngaih laia sum khawh ralna mai ani thei a ti a, hmasawnna hrang hrang lo awm turah ram himna ngaih pawimawh chu sawrkar tih tur ber ani tih sawiin hmasawn turin fimkhur taka kal a pawimawh thu a sawi.
BJP MLA leh Siaha bialtu Dr K. Beichhua chuan Larsap thusawi chu kum 10 anlo kal tawha thusawi tha ber zinga mi a ti a, sawrkar kal tum dan chu a tak ram an thlen ngei a beisei tih sawiin mipuiten sawrkar thlawp tlat turin a duh tih a ti a, sawrkar pawh mipui beiseina ti thlawn lo turin a duh tih a sawi. Congress MLA leh Lunglei West bialtu MLA Pu Ngunlianchunga chuan sawrkar tharah mipuiin sawrkar atha alo beisei thin chu a takin thleng thei se a duh thu a sawi a, sawrkar chuan sum hmanchhuahna ni ngawt lo in a hmuh let ve tur lam a ngaihtuah a pawimawh a ti a, Sawrkar thara thlai thar lei policy chuan ramnga humhalh tam tak a tichhe dawn tih ngaihtuah tel a pawimawh a ti a, ram nghet zawnga kal anih loh chuan hmasawnna sum duh luatah ram a chhiat phah thei tih a sawi bawk.
